کس شان سے اٹھا ہے ساقی ترا مستانہ

کس شان سے اٹھا ہے ساقی ترا مستانہ

حوریں لیے آتی ہیں پیمانے پہ پیمانہ

ماتھا میں رگڑتا ہوں قسمت مری چمکا دے

تجھ میں تو شرارے ہیں سنگ در جانانہ

نیرنگیٔ وحدت سے مجنوں کا یہ نقشہ ہے

صورت تو ہے لیلیٰ کی اور بھیس ہے مردانہ

جس دن سے دوئی میں نے کھو دی ہے اسی دن سے

خود نور حقیقت ہوں خود جلوۂ جانانہ

دل میرا مع حسرت مدفن میں بھی ساتھ آیا

مدفن نہ کہو اس کو یہ ہے مرا غم خانہ

لے خلوت مدفن میں مضطرؔ ترا آ پہنچا

اب چھوڑ دے اے وحدت انداز حجابانہ