mohabbat ki be-hoshiyan dekhta hun

mohabbat kī be-hoshiyāñ dekhtā huuñ

huuñ be-ḳhud magar mastiyāñ dekhtā huuñ

ġharīq-e-fanā hastiyāñ dekhtā huuñ

talātum kī nairañgiyāñ dekhtā huuñ

sharāb-e-mohabbat ne kholī haiñ āñkheñ

tire husn kī garmiyāñ dekhtā huuñ

bahut yaad aatī hai chashm-e-taġhāful

kaleje meñ jab barchhiyāñ dekhtā huuñ

junūn-e-mohabbat kī aatī haiñ yādeñ

garebāñ kī jab dhajjiyāñ dekhtā huuñ

unhoñ-ne kabhī terā dāman na thāmā

maiñ rotā huuñ jab uñgliyāñ dekhtā huuñ

ye koh-e-alam kyuuñ uThātā maiñ lekin

tire vāste saḳhtiyāñ dekhtā huuñ

ye bijlī bhī us kī ye tinke bhī us ke

maiñ kyuuñ jānib-e-āshiyāñ dekhtā huuñ

nasheman mirā kaash patte chhupā leñ

chamakte hue bijliyāñ dekhtā huuñ

butoñ se bachā thā ki pūjūñgā tujh ko

magar is meñ bhī saḳhtiyāñ dekhtā huuñ

falak phūñk detā na aahoñ se 'muztar'

na jaane maiñ kyā darmiyāñ dekhtā huuñ

mohabbat ki be-hoshiyan dekhta hun

hun be-KHud magar mastiyan dekhta hun

ghariq-e-fana hastiyan dekhta hun

talatum ki nairangiyan dekhta hun

sharab-e-mohabbat ne kholi hain aankhen

tere husn ki garmiyan dekhta hun

bahut yaad aati hai chashm-e-taghaful

kaleje mein jab barchhiyan dekhta hun

junun-e-mohabbat ki aati hain yaaden

gareban ki jab dhajjiyan dekhta hun

unhon-ne kabhi tera daman na thama

main rota hun jab ungliyan dekhta hun

ye koh-e-alam kyun uThata main lekin

tere waste saKHtiyan dekhta hun

ye bijli bhi us ki ye tinke bhi us ke

main kyun jaanib-e-ashiyan dekhta hun

nasheman mera kash patte chhupa len

chamakte hue bijliyan dekhta hun

buton se bacha tha ki pujunga tujh ko

magar is mein bhi saKHtiyan dekhta hun

falak phunk deta na aahon se 'muztar'

na jaane main kya darmiyan dekhta hun