aankh khulte hi tera jalwa nazar aane laga

aañkh khulte hī tirā jalvā nazar aane lagā

tū mujhe parde meñ be-pardā nazar aane lagā

be-piye dariyā ko qatra jāntā thā ishq meñ

jab se pī qatra mujhe dariyā nazar aane lagā

mujh ko mere ishq ne pahuñchā diyā aisī jagah

jis jagah se arsh bhī nīchā nazar aane lagā

shīsha-e-dil kī safā.ī TuuT kar zāhir huī

dil ke har TukḌe meñ muñh terā nazar aane lagā

is se pahle aañkh kī putlī kī kyā auqāt thī

tere nuqta dete hī kyā kyā nazar aane lagā

tark-e-hastī se mirī ḳhāna-badoshī miT ga.ī

lā-makāñ pahuñchā to ghar apnā nazar aane lagā

ḳhalvat-e-vahdat meñ qaid-e-bandagī jaatī rahī

mujh ko apnī zaat meñ maulā nazar aane lagā

dasht meñ majnūñ ke armānoñ kī tasvīreñ khiñchīñ

har shajar meñ jalvā-e-laila nazar aane lagā

naqsh-e-sūrat ne patā jis rose se terā diyā

but-kada us rose se ka.abā nazar aane lagā

TikTikī bāñdhī hai kyuuñ 'muztar' ne vaqt-e-vāpsīñ

kyā nishān-e-manzil-e-uqbā nazar aane lagā

aankh khulte hi tera jalwa nazar aane laga

tu mujhe parde mein be-parda nazar aane laga

be-piye dariya ko qatra jaanta tha ishq mein

jab se pi qatra mujhe dariya nazar aane laga

mujh ko mere ishq ne pahuncha diya aisi jagah

jis jagah se arsh bhi nicha nazar aane laga

shisha-e-dil ki safai TuT kar zahir hui

dil ke har TukDe mein munh tera nazar aane laga

is se pahle aankh ki putli ki kya auqat thi

tere nuqta dete hi kya kya nazar aane laga

tark-e-hasti se meri KHana-badoshi miT gai

la-makan pahuncha to ghar apna nazar aane laga

KHalwat-e-wahdat mein qaid-e-bandagi jati rahi

mujh ko apni zat mein maula nazar aane laga

dasht mein majnun ke armanon ki taswiren khinchin

har shajar mein jalwa-e-laila nazar aane laga

naqsh-e-surat ne pata jis rose se tera diya

but-kada us rose se kaba nazar aane laga

TikTiki bandhi hai kyun 'muztar' ne waqt-e-wapsin

kya nishan-e-manzil-e-uqba nazar aane laga