kuchh aisa dard shor-e-qalb-e-bulbul se nikal aaya

kuchh aisā dard shor-e-qalb-e-bulbul se nikal aayā

ki vo ḳhud rañg ban kar chehra-e-gul se nikal aayā

haqīqat kā nishāñ chashm-e-tāmmul se nikal aayā

hamāre juzv-e-hastī kā pata kul se nikal aayā

batāyā haal yuñ kuuze meñ dariyā ke samāne kā

ki saaqī ḳhud mujassam sāġhar-e-mul se nikal aayā

kisī kī be-niyāzī par maiñ apnī jaan detā huuñ

gile ke vāsta teġh-e-taġhāful se nikal aayā

añdherā qabr kā dekhā to phir yaad aa ga.e gesū

maiñ samjhā thā ki ab maiñ tere kākul se nikal aayā

maiñ samjhūñgā ki mere dāġh-e-isyāñ dhul ga.e saare

agar aañsū tirī chashm-e-taġhāful se nikal aayā

azān-e-panj-vaqta par kabhī muñh se nahīñ bolā

magar rindoñ ne jab fariyād kī ġhul se nikal aayā

qanā.at dūsre ke āsare kā naam hai 'muztar'

ḳhudā hai jo koī hadd-e-tavakkul se nikal aayā

kuchh aisa dard shor-e-qalb-e-bulbul se nikal aaya

ki wo KHud rang ban kar chehra-e-gul se nikal aaya

haqiqat ka nishan chashm-e-tammul se nikal aaya

hamare juzw-e-hasti ka pata kul se nikal aaya

bataya haal yun kuze mein dariya ke samane ka

ki saqi KHud mujassam saghar-e-mul se nikal aaya

kisi ki be-niyazi par main apni jaan deta hun

gile ke wasta tegh-e-taghaful se nikal aaya

andhera qabr ka dekha to phir yaad aa gae gesu

main samjha tha ki ab main tere kakul se nikal aaya

main samjhunga ki mere dagh-e-isyan dhul gae sare

agar aansu teri chashm-e-taghaful se nikal aaya

azan-e-panj-waqta par kabhi munh se nahin bola

magar rindon ne jab fariyaad ki ghul se nikal aaya

qanaat dusre ke aasare ka nam hai 'muztar'

KHuda hai jo koi hadd-e-tawakkul se nikal aaya