کچھ ایسا درد شور قلب بلبل سے نکل آیا

کچھ ایسا درد شور قلب بلبل سے نکل آیا

کہ وہ خود رنگ بن کر چہرۂ گل سے نکل آیا

حقیقت کا نشاں چشم تامل سے نکل آیا

ہمارے جزو ہستی کا پتہ کل سے نکل آیا

بتایا حال یوں کوزے میں دریا کے سمانے کا

کہ ساقی خود مجسم ساغر مل سے نکل آیا

کسی کی بے نیازی پر میں اپنی جان دیتا ہوں

گلے کے واسطہ تیغ تغافل سے نکل آیا

اندھیرا قبر کا دیکھا تو پھر یاد آ گئے گیسو

میں سمجھا تھا کہ اب میں تیرے کاکل سے نکل آیا

میں سمجھوں گا کہ میرے داغ عصیاں دھل گئے سارے

اگر آنسو تری چشم تغافل سے نکل آیا

اذان پنج وقتہ پر کبھی منہ سے نہیں بولا

مگر رندوں نے جب فریاد کی غل سے نکل آیا

قناعت دوسرے کے آسرے کا نام ہے مضطرؔ

خدا ہے جو کوئی حد توکل سے نکل آیا