muztarib ho kar koi ba-chashm-e-tar aa hi gaya

muztarib ho kar koī bā-chashm-e-tar aa hī gayā

aaj dariyā-e-mohabbat josh par aa hī gayā

aaj vaqt-e-shām vo jān-e-sahar aa hī gayā

marhabā ai ziist nāloñ meñ asar aa hī gayā

aah meñ ai zauq-e-nazzāra asar aa hī gayā

thā jo parde meñ vo be-parda nazar aa hī gayā

iqtizā-e-dil ke aage zabt kī chaltī nahīñ

terī mahfil meñ na aanā thā magar aa hī gayā

zauq-e-be-pāyāñ ke qurbāñ jalva-e-husn-e-azal

jis taraf nazreñ uThīñ mujh ko nazar aa hī gayā

maiñ ne piine kā irāda hī kiyā thā us taraf

sāġhar-e-sahbā liye saaqī idhar aa hī gayā

is qadar royā hai koī hijr-e-jānāñ meñ 'azīz'

ashk ban kar aañkh meñ ḳhūn-e-jigar aa hī gayā

muztarib ho kar koi ba-chashm-e-tar aa hi gaya

aaj dariya-e-mohabbat josh par aa hi gaya

aaj waqt-e-sham wo jaan-e-sahar aa hi gaya

marhaba ai zist nalon mein asar aa hi gaya

aah mein ai zauq-e-nazzara asar aa hi gaya

tha jo parde mein wo be-parda nazar aa hi gaya

iqtiza-e-dil ke aage zabt ki chalti nahin

teri mahfil mein na aana tha magar aa hi gaya

zauq-e-be-payan ke qurban jalwa-e-husn-e-azal

jis taraf nazren uThin mujh ko nazar aa hi gaya

main ne pine ka irada hi kiya tha us taraf

saghar-e-sahba liye saqi idhar aa hi gaya

is qadar roya hai koi hijr-e-jaanan mein 'aziz'

ashk ban kar aankh mein KHun-e-jigar aa hi gaya