مضطرب ہو کر کوئی با چشم تر آ ہی گیا

مضطرب ہو کر کوئی با چشم تر آ ہی گیا

آج دریائے محبت جوش پر آ ہی گیا

آج وقت شام وہ جان سحر آ ہی گیا

مرحبا اے زیست نالوں میں اثر آ ہی گیا

آہ میں اے ذوق نظارہ اثر آ ہی گیا

تھا جو پردے میں وہ بے پردہ نظر آ ہی گیا

اقتضائے دل کے آگے ضبط کی چلتی نہیں

تیری محفل میں نہ آنا تھا مگر آ ہی گیا

ذوق بے پایاں کے قرباں جلوۂ حسن ازل

جس طرف نظریں اٹھیں مجھ کو نظر آ ہی گیا

میں نے پینے کا ارادہ ہی کیا تھا اس طرف

ساغر صہبا لیے ساقی ادھر آ ہی گیا

اس قدر رویا ہے کوئی ہجر جاناں میں عزیزؔ

اشک بن کر آنکھ میں خون جگر آ ہی گیا