na burqa ruKH pe hoga aur na parda darmiyan hoga

na burqā ruḳh pe hogā aur na parda darmiyāñ hogā

qayāmat meñ ye ai parda-nashīñ parda kahāñ hogā

na jab ahl-e-makāñ hoñge na jab koī makāñ hogā

jahāñ kā rañg kyā us vaqt ai ahl-e-jahāñ hogā

judā paayā hamesha ham ne maslak ishq vāloñ kā

hamārā maqbara dair-o-haram ke darmiyāñ hogā

maiñ vo gul huuñ na fursat dī ḳhizāñ ne jis ko hañsne kī

charāġh-e-qabr bhī jal kar na apnā gul-fishāñ hogā

karoge jab kisī se ishq tab dekhoge rañg us kā

ye sau parde meñ jhalkegā ye chhup kar bhī ayaañ hogā

adū ko āzmāoge ki ham ko āzmāoge

hamārā imtihāñ hogā ki us kā imtihāñ hogā

taraqqī ishq kī jaulāñ karegī aur vahshat ko

jahāñ tak aag ye bhaḌkegī utnā hī dhuāñ hogā

bagūloñ kī tarah sahrā meñ maare maare phirte haiñ

hamārā dukh vahī samjhegā jo be-ḳhānumāñ hogā

nahīñ āsān paanā hashr meñ yārān-e-rafta kā

vahāñ to har qadam par kārvāñ-dar-kārvāñ hogā

ilāhī paar kab utreñge dariyā-e-shahādat ke

ḳhudāyā kab safīna āb-e-ḳhanjar meñ ravāñ hogā

khulegā hashr meñ nāz-o-niyāz-e-ishq kā uqda

maiñ us kā mehmāñ hūñgā vo merā mezbāñ hogā

adam kyā hashr meñ bhī ro.eñge yārān-e-rafta ko

kahāñ ham hoñge jāneñ qāfila apnā kahāñ hogā

yahī pahchān bahr-e-ġham meñ hogī merī kashtī kī

na us par nāḳhudā hogā na us meñ bādbāñ hogā

usī se pūchh lenā tum pashemānī-e-ulfat ko

pas-e-dīvār rakkhe sar pe haath ik naujavāñ hogā

hamāre ḳhāna-e-dil meñ hai jaisā kuchh ki sannāTā

ziyāda is se kyā vīrān majnūñ kā makāñ hogā

vo ghar kī raah legā aur adam kī raah ham leñge

hamārā faisla shab darmiyāñ vaqt-e-azāñ hogā

galī meñ apne bīmāroñ ko vo rahne nahīñ detā

kahāñ maut aa.egī yārab mazār apnā kahāñ hogā

ayaañ jo ho chukā aalam meñ aalam par na mar us ke

abhī to ḳhaak ke parde meñ kyā kyā kuchh nihāñ hogā

jise dekhā thā zer-e-naqsh-e-pā kūche meñ kal tū ne

vo terā nīm-jāñ hogā vo terā nā-tavāñ hogā

jahāñ haiñ mahv-e-naġhma bulbuleñ gul jis meñ ḳhandāñ haiñ

usī gulshan meñ kal zāġh-o-zaġhan kā āshiyāñ hogā

sahāre par jo sarsar ke uThā thā gir paḌā uTh ke

vo us kūcha meñ merā hī ġhubār-e-nā-tavāñ hogā

usī jānib chale jā.eñge vahshī tire be-khaTke

jidhar ḳhār-e-bayābān-e-junūñ dāman-kashāñ hogā

maqām-e-imtihāñ ḳhāliq ne aalam ko banāyā hai

yahāñ jab tak rahoge imtihāñ hī imtihāñ hogā

talāsh-e-yār se fāriġh na hoñge ba.ad-murdan bhī

jidhar jā.egī apnī ruuh lāsha bhī ravāñ hogā

tire kūche meñ aksar ik bagūla ḳhaak uḌātā hai

miTā Daalā jise tū ne vahī be-ḳhānumāñ hogā

yahī kyā 'arsh' thā jo paḌh gayā andāz-e-'momin' meñ

thiiñ tarkībeñ alag sab se vahī jādū-bayāñ hogā

na burqa ruKH pe hoga aur na parda darmiyan hoga

qayamat mein ye ai parda-nashin parda kahan hoga

na jab ahl-e-makan honge na jab koi makan hoga

jahan ka rang kya us waqt ai ahl-e-jahan hoga

juda paya hamesha hum ne maslak ishq walon ka

hamara maqbara dair-o-haram ke darmiyan hoga

main wo gul hun na fursat di KHizan ne jis ko hansne ki

charagh-e-qabr bhi jal kar na apna gul-fishan hoga

karoge jab kisi se ishq tab dekhoge rang us ka

ye sau parde mein jhalkega ye chhup kar bhi ayan hoga

adu ko aazmaoge ki hum ko aazmaoge

hamara imtihan hoga ki us ka imtihan hoga

taraqqi ishq ki jaulan karegi aur wahshat ko

jahan tak aag ye bhaDkegi utna hi dhuan hoga

bagulon ki tarah sahra mein mare mare phirte hain

hamara dukh wahi samjhega jo be-KHanuman hoga

nahin aasan pana hashr mein yaran-e-rafta ka

wahan to har qadam par karwan-dar-karwan hoga

ilahi par kab utrenge dariya-e-shahadat ke

KHudaya kab safina aab-e-KHanjar mein rawan hoga

khulega hashr mein naz-o-niyaz-e-ishq ka uqda

main us ka mehman hunga wo mera mezban hoga

adam kya hashr mein bhi roenge yaran-e-rafta ko

kahan hum honge jaanen qafila apna kahan hoga

yahi pahchan bahr-e-gham mein hogi meri kashti ki

na us par naKHuda hoga na us mein baadban hoga

usi se puchh lena tum pashemani-e-ulfat ko

pas-e-diwar rakkhe sar pe hath ek naujawan hoga

hamare KHana-e-dil mein hai jaisa kuchh ki sannaTa

ziyaada is se kya viran majnun ka makan hoga

wo ghar ki rah lega aur adam ki rah hum lenge

hamara faisla shab darmiyan waqt-e-azan hoga

gali mein apne bimaron ko wo rahne nahin deta

kahan maut aaegi yarab mazar apna kahan hoga

ayan jo ho chuka aalam mein aalam par na mar us ke

abhi to KHak ke parde mein kya kya kuchh nihan hoga

jise dekha tha zer-e-naqsh-e-pa kuche mein kal tu ne

wo tera nim-jaan hoga wo tera na-tawan hoga

jahan hain mahw-e-naghma bulbulen gul jis mein KHandan hain

usi gulshan mein kal zagh-o-zaghan ka aashiyan hoga

sahaare par jo sarsar ke uTha tha gir paDa uTh ke

wo us kucha mein mera hi ghubar-e-na-tawan hoga

usi jaanib chale jaenge wahshi tere be-khaTke

jidhar KHar-e-bayaban-e-junun daman-kashan hoga

maqam-e-imtihan KHaliq ne aalam ko banaya hai

yahan jab tak rahoge imtihan hi imtihan hoga

talash-e-yar se farigh na honge baad-murdan bhi

jidhar jaegi apni ruh lasha bhi rawan hoga

tere kuche mein aksar ek bagula KHak uData hai

miTa Dala jise tu ne wahi be-KHanuman hoga

yahi kya 'arsh' tha jo paDh gaya andaz-e-'momin' mein

thin tarkiben alag sab se wahi jadu-bayan hoga