na duniya ki KHabar hai kuchh na din ka hosh hai sar mein

na duniyā kī ḳhabar hai kuchh na diiñ kā hosh hai sar meñ

bhulāyā do-jahāñ ko tū ne saaqī ek sāġhar meñ

misāl-e-ā.īna tū bhī agar baiThā rahe ghar meñ

jamāl-e- shāhid-e- maqsūd paidā ho tire bar meñ

vahī paidā kare gā dil meñ bhī ishq-e-haqīqat ko

banāyā jis ne gauhar ko sadaf meñ la.al patthar meñ

javāñ-mardī tirī aur zor-o-tāqat jab maiñ mānūñgā

agar sambhlā rahe tū pir-e- gardūñ merī Thokar meñ

falak asbāb-e- duniyā mujh se kyā haath aa.egā tire

nahii. hai bhiik kā bhī Thekrā darvesh ke ghar meñ

jo a.alā haiñ maqām un kā ho asfal ġhair mumkin hai

bhaḌaktī tuur kī ātish na dekhī ham ne mijmar meñ

vahī ḳhvāhish hai duniyā kī vahī ġhaflat hai uqbā se

nahii. karte haiñ ab tak farq bad meñ aur behtar meñ

paḌe haiñ kunj-e- marqad meñ kafan pahne hue ġhāfil

jo phūle bhī samāte the na kam-ḳhvāb-e-moshajjar meñ

phaḌak kar dam nikal jā.egā yād-e-gul meñ bulbul kā

lipaTvā de qafas sayyād phulkārī kī chādar meñ

baḌā hañgāma hai shāyad hamāre ustaḳhvānoñ par

huā jhagḌā humā meñ aur sagān-e-kū-e-dilbar meñ

kiyā hai ḳhud pasand ā.īna ne saare hasīnoñ ko

baḌā ye aib niklā san.at-e-dast-e-sikandar meñ

sip.har-e-husn hai tū aur aḳhtar ḳhāl-e-āriz haiñ

mah-e-kāmil kā a.alam hai tire rū-e-munavvar meñ

maiñ vo ātish-nafs bulbul huuñ sun lenā tū o gulchīñ

lagā dī aag nāloñ ne mire sayyād ke ghar meñ

lahū tū pī chukā ai ishq ab to haath uThā mujh se

nahii. juz ustuḳhvān-o-post baaqī jism-e-lāġhar meñ

vo rāhat paa.ī hai kunj-e-lahad meñ ḳhud maiñ hairāñ huuñ

kanār-e-gor meñ sotā huuñ yā āġhosh-e-mādar meñ

huā huuñ daaġh khā kar ishq meñ laala ezāroñ ke

mirā murdā lipaTtā jāygā phūloñ kī chādar meñ

ḳhudā chāhe to 'rind' ab kī dar-e-maqsūd haath aa.e

tu kal kar ke ik ġhota lagā tū phir samandar meñ

na duniya ki KHabar hai kuchh na din ka hosh hai sar mein

bhulaya do-jahan ko tu ne saqi ek saghar mein

misal-e-aina tu bhi agar baiTha rahe ghar mein

jamal-e- shahid-e- maqsud paida ho tere bar mein

wahi paida kare ga dil mein bhi ishq-e-haqiqat ko

banaya jis ne gauhar ko sadaf mein lal patthar mein

jawan-mardi teri aur zor-o-taqat jab main manunga

agar sambhla rahe tu pir-e- gardun meri Thokar mein

falak asbab-e- duniya mujh se kya hath aaega tere

nahi hai bhik ka bhi Thekra darwesh ke ghar mein

jo aala hain maqam un ka ho asfal ghair mumkin hai

bhaDakti tur ki aatish na dekhi hum ne mijmar mein

wahi KHwahish hai duniya ki wahi ghaflat hai uqba se

nahi karte hain ab tak farq bad mein aur behtar mein

paDe hain kunj-e- marqad mein kafan pahne hue ghafil

jo phule bhi samate the na kam-KHwab-e-moshajjar mein

phaDak kar dam nikal jaega yaad-e-gul mein bulbul ka

lipaTwa de qafas sayyaad phulkari ki chadar mein

baDa hangama hai shayad hamare ustaKHwanon par

hua jhagDa huma mein aur sagan-e-ku-e-dilbar mein

kiya hai KHud pasand aaina ne sare hasinon ko

baDa ye aib nikla sanat-e-dast-e-sikandar mein

siphar-e-husn hai tu aur aKHtar KHal-e-ariz hain

mah-e-kaamil ka aalam hai tere ru-e-munawwar mein

main wo aatish-nafs bulbul hun sun lena tu o gulchin

laga di aag nalon ne mere sayyaad ke ghar mein

lahu tu pi chuka ai ishq ab to hath uTha mujh se

nahi juz ustuKHwan-o-post baqi jism-e-laghar mein

wo rahat pai hai kunj-e-lahad mein KHud main hairan hun

kanar-e-gor mein sota hun ya aaghosh-e-madar mein

hua hun dagh kha kar ishq mein lala ezaron ke

mera murda lipaTta jayga phulon ki chadar mein

KHuda chahe to 'rind' ab ki dar-e-maqsud hath aae

tu kal kar ke ek ghota laga tu phir samandar mein