na kar saKHti sitamgar saKHt-jaan par

na kar saḳhtī sitamgar saḳht-jāñ par

paḌā rahne de sañg-e-āstāñ par

liye phirtī hai ashkoñ kī ravānī

ravāñ huuñ kashti-e-āb-e-ravāñ par

hamārī āh-e-sozāñ ke sharāre

sitāre ban ga.e haiñ āsmāñ par

ye mujh ko saḳht-jānī par hai ġharrā

paTakte sar haiñ sañg-e-āstāñ par

chalā jaatā nahīñ uftādgī se

paḌā huuñ naqsh-e-pā-e-rahravāñ par

tasavvur meñ huā josh-e-tahayyur

vahīñ baiThā rahā baiThā jahāñ par

batā de mujh ko ai betābī-e-dil

zamīñ par hai ki bijlī āsmāñ par

syāhī tīra-baḳhtī kī hamārī

shab-e-ġham ban ga.ī hai āsmāñ par

ye dariyā-e-mohabbat maujzan hai

paḌā huuñ bistar-e-ashk-e-ravāñ par

maiñ ik tasvīr-e-dīvār-e-makāñ huuñ

hai sab kuchh aur nahīñ kuchh bhī zabāñ par

subuk-rūhī se itnā huuñ subuk maiñ

ravāñ huuñ zarra-e-reg-e-ravāñ par

mo.azzin tujh ko āḳhir ye huā kyā

are zālim azaañ kaisī azaañ par

ġharaz us kī galī meñ kaT ga.ī shab

yahāñ par gaahe thā gaahe vahāñ par

salāmat hai jo apnī lāġharī ye

na hūñgā paar mor-e-nā-tavāñ par

habāb-āsā nahīñ hājat ḳhizar kī

chaleñ kyuuñ naqsh-e-pā-e-dahr vaañ par

nishān-e-be-nishānī kah rahā hai

miTe jaate ho kyuuñ nām-o-nishāñ par

buto sun lo maiñ 'momin-ḳhāñ' nahīñ huuñ

ki īmāñ lā.ūñ us jhūTe bayāñ par

chalo do-ghūñT pī lo tum bhī ai 'arsh'

hai ik melā dar-e-pīr-e-muġhāñ par

na kar saKHti sitamgar saKHt-jaan par

paDa rahne de sang-e-astan par

liye phirti hai ashkon ki rawani

rawan hun kashti-e-ab-e-rawan par

hamari aah-e-sozan ke sharare

sitare ban gae hain aasman par

ye mujh ko saKHt-jaani par hai gharra

paTakte sar hain sang-e-astan par

chala jata nahin uftadgi se

paDa hun naqsh-e-pa-e-rahrawan par

tasawwur mein hua josh-e-tahayyur

wahin baiTha raha baiTha jahan par

bata de mujh ko ai betabi-e-dil

zamin par hai ki bijli aasman par

syahi tira-baKHti ki hamari

shab-e-gham ban gai hai aasman par

ye dariya-e-mohabbat maujzan hai

paDa hun bistar-e-ashk-e-rawan par

main ek taswir-e-diwar-e-makan hun

hai sab kuchh aur nahin kuchh bhi zaban par

subuk-ruhi se itna hun subuk main

rawan hun zarra-e-reg-e-rawan par

moazzin tujh ko aaKHir ye hua kya

are zalim azan kaisi azan par

gharaz us ki gali mein kaT gai shab

yahan par gahe tha gahe wahan par

salamat hai jo apni laghari ye

na hunga par mor-e-na-tawan par

habab-asa nahin hajat KHizar ki

chalen kyun naqsh-e-pa-e-dahr wan par

nishan-e-be-nishani kah raha hai

miTe jate ho kyun nam-o-nishan par

buto sun lo main 'momin-KHan' nahin hun

ki iman laun us jhuTe bayan par

chalo do-ghunT pi lo tum bhi ai 'arsh'

hai ek mela dar-e-pir-e-mughan par