نہ کر سختی ستم گر سخت جاں پر

نہ کر سختی ستم گر سخت جاں پر

پڑا رہنے دے سنگ آستاں پر

لئے پھرتی ہے اشکوں کی روانی

رواں ہوں کشتی آب رواں پر

ہماری آہ سوزاں کے شرارے

ستارے بن گئے ہیں آسماں پر

یہ مجھ کو سخت جانی پر ہے غرا

پٹکتے سر ہیں سنگ آستاں پر

چلا جاتا نہیں افتادگی سے

پڑا ہوں نقش پائے رہرواں پر

تصور میں ہوا جوش تحیر

وہیں بیٹھا رہا بیٹھا جہاں پر

بتا دے مجھ کو اے بیتابیٔ دل

زمیں پر ہے کہ بجلی آسماں پر

سیاہی تیرہ بختی کی ہماری

شب غم بن گئی ہے آسماں پر

یہ دریائے محبت موجزن ہے

پڑا ہوں بستر اشک رواں پر

میں اک تصویر دیوار مکاں ہوں

ہے سب کچھ اور نہیں کچھ بھی زباں پر

سبک روحی سے اتنا ہوں سبک میں

رواں ہوں ذرۂ ریگ رواں پر

موذن تجھ کو آخر یہ ہوا کیا

ارے ظالم اذاں کیسی اذاں پر

غرض اس کی گلی میں کٹ گئی شب

یہاں پر گاہے تھا گاہے وہاں پر

سلامت ہے جو اپنی لاغری یہ

نہ ہوں گا پار مور ناتواں پر

حباب آسا نہیں حاجت خضر کی

چلیں کیوں نقش پائے دہر واں پر

نشان بے نشانی کہہ رہا ہے

مٹے جاتے ہو کیوں نام و نشاں پر

بتو سن لو میں مومنؔ خاں نہیں ہوں

کہ ایماں لاؤں اس جھوٹے بیاں پر

چلو دو گھونٹ پی لو تم بھی اے عرشؔ

ہے اک میلا در پیر مغاں پر