na kisi amir ki justuju hai na rahnuma ki talash hai

na kisī amiir kī justujū hai na rahnumā kī talāsh hai

mire kārvān-e-nigāh ko tire naqsh-e-pā kī talāsh hai

na haram kī samt nazar uThā na baḌhā qadam sū-e-but-kadā

vo hai dil jaloñ kī karāh meñ tujhe jis ḳhudā kī talāsh hai

ye jahāñ hai qulzum imtihāñ yahāñ apnā ḳhizr hai har javāñ

lage us ke haath kināra kyuuñ jise nāḳhudā kī talāsh hai

na bhaTak jahāñ meñ tū dar-badar na akelā phir tū idhar udhar

mire saath chal mirā saath de ki mujhe ḳhudā kī talāsh hai

mire shauq sajda-e-ishq par kare zarra zarra na kyuuñ nazar

ki mirī jabīn-e-niyāz ko tire naqsh-e-pā kī talāsh hai

uThe har qadam pe nazar na kyuuñ jhuke dam-ba-dam mirā sar na kyuuñ

rah-e-zindagī-e-darāz meñ mujhe ġham rubā kī talāsh hai

maiñ ḳhudā huuñ aur na ḳhudā-numā magar us kā juz-o-latīf huuñ

mujhe rakh tū apnī nigāh meñ jo tujhe ḳhudā kī talāsh hai

na kisi amir ki justuju hai na rahnuma ki talash hai

mere karwan-e-nigah ko tere naqsh-e-pa ki talash hai

na haram ki samt nazar uTha na baDha qadam su-e-but-kada

wo hai dil jalon ki karah mein tujhe jis KHuda ki talash hai

ye jahan hai qulzum imtihan yahan apna KHizr hai har jawan

lage us ke hath kinara kyun jise naKHuda ki talash hai

na bhaTak jahan mein tu dar-badar na akela phir tu idhar udhar

mere sath chal mera sath de ki mujhe KHuda ki talash hai

mere shauq sajda-e-ishq par kare zarra zarra na kyun nazar

ki meri jabin-e-niyaz ko tere naqsh-e-pa ki talash hai

uThe har qadam pe nazar na kyun jhuke dam-ba-dam mera sar na kyun

rah-e-zindagi-e-daraaz mein mujhe gham ruba ki talash hai

main KHuda hun aur na KHuda-numa magar us ka juz-o-latif hun

mujhe rakh tu apni nigah mein jo tujhe KHuda ki talash hai