نہ کسی امیر کی جستجو ہے نہ رہنما کی تلاش ہے

نہ کسی امیر کی جستجو ہے نہ رہنما کی تلاش ہے

مرے کاروان نگاہ کو ترے نقش پا کی تلاش ہے

نہ حرم کی سمت نظر اٹھا نہ بڑھا قدم سوئے بتکدہ

وہ ہے دل جلوں کی کراہ میں تجھے جس خدا کی تلاش ہے

یہ جہاں ہے قلزم امتحاں یہاں اپنا خضر ہے ہر جواں

لگے اس کے ہاتھ کنارہ کیوں جسے ناخدا کی تلاش ہے

نہ بھٹک جہاں میں تو در بدر نہ اکیلا پھر تو ادھر ادھر

مرے ساتھ چل مرا ساتھ دے کہ مجھے خدا کی تلاش ہے

مرے شوق سجدۂ عشق پر کرے ذرہ ذرہ نہ کیوں نظر

کہ مری جبین نیاز کو ترے نقش پا کی تلاش ہے

اٹھے ہر قدم پہ نظر نہ کیوں جھکے دم بدم مرا سر نہ کیوں

رہے زندگیٔ دراز میں مجھے غم ربا کی تلاش ہے

میں خدا ہوں اور نہ خدا‌ نما مگر اس کا جز و لطیف ہوں

مجھے رکھ تو اپنی نگاہ میں جو تجھے خدا کی تلاش ہے