nakaam mohabbat ki itni si kahani hai

nākām mohabbat kī itnī sī kahānī hai

din raat judā.ī meñ ashkoñ kī ravānī hai

kyā tum se kahūñ dilbar is dil kī fuġhānī ko

bas aah hai naale haiñ zaḳhmoñ kī javānī hai

ham ne to mohabbat meñ har chiiz luTā dī hai

lekin vo ye kahte haiñ aafat abhī aanī hai

kī ham ne mohabbat to ye baat samajh aa.ī

fariyād hai vahshat hai jo hū kī zabānī hai

ġhārat-garī pe us kī dil ḳhuun se royā hai

afsos hai mātam hai aur āh-o-fuġhāñī hai

bechā hai sukūn-e-dil aur dard ḳharīdā hai

duniyā hai ye vahshat kī aur sho.ala-fishānī hai

har zaḳhm mere dil kā hañs hañs ke ye kahtā hai

dī us ne vafāoñ kī kyā ḳhuub nishānī hai

ham ne jo kiyā shikva nākām mohabbat kā

us ne kahā ye hañs kar jhūTī ye kahānī hai

dhokā mirī sūrat se mahbūb na tum khānā

hoñToñ pe hañsī gar hai āñkhoñ meñ to paanī hai

yādeñ haiñ jo dilbar kī miT jaa.eñ na vo dil se

vo ziist kā hissa hai vahshat kī nishānī hai

hālat pe mirī dekho mātam hai sabā kartī

ye merī mohabbat kī dil-soz kahānī hai

vājib hai asar tum par jaañ apnī luTā Daalo

dastūr-e-mohabbat kī ye rasm purānī hai

nakaam mohabbat ki itni si kahani hai

din raat judai mein ashkon ki rawani hai

kya tum se kahun dilbar is dil ki fughani ko

bas aah hai nale hain zaKHmon ki jawani hai

hum ne to mohabbat mein har chiz luTa di hai

lekin wo ye kahte hain aafat abhi aani hai

ki hum ne mohabbat to ye baat samajh aai

fariyaad hai wahshat hai jo hu ki zabani hai

ghaarat-gari pe us ki dil KHun se roya hai

afsos hai matam hai aur aah-o-fughani hai

becha hai sukun-e-dil aur dard KHarida hai

duniya hai ye wahshat ki aur shoala-fishani hai

har zaKHm mere dil ka hans hans ke ye kahta hai

di us ne wafaon ki kya KHub nishani hai

hum ne jo kiya shikwa nakaam mohabbat ka

us ne kaha ye hans kar jhuTi ye kahani hai

dhoka meri surat se mahbub na tum khana

honTon pe hansi gar hai aankhon mein to pani hai

yaaden hain jo dilbar ki miT jaen na wo dil se

wo zist ka hissa hai wahshat ki nishani hai

haalat pe meri dekho matam hai saba karti

ye meri mohabbat ki dil-soz kahani hai

wajib hai asar tum par jaan apni luTa Dalo

dastur-e-mohabbat ki ye rasm purani hai