nam hua badnam kisi ka

naam huā badnām kisī kā

naam kisī kā kaam kisī kā

jab se kisī par dil aayā hai

ḳhatm huā ārām kisī kā

husn-e-fareb-e-ishq na pūchho

said kisī kā daam kisī kā

muñh meñ misrī ghol rahā huuñ

hai jo zban par naam kisī kā

tere qurbāñ achchhe saaqī

pher na ḳhālī jaam kisī kā

manzil-e-haq meñ terī anā kyoñ

bhuul na jā anjām kisī kā

rāh-e-vafā āsān nahīñ hai

pahle dāman thaam kisī kā

mere hamesha kaam aayā hai

har mushkil meñ naam kisī kā

vo bhī koī banda jo 'kāmil'

sub.h kisī kā shaam kisī kā

nam hua badnam kisi ka

nam kisi ka kaam kisi ka

jab se kisi par dil aaya hai

KHatm hua aaram kisi ka

husn-e-fareb-e-ishq na puchho

said kisi ka dam kisi ka

munh mein misri ghol raha hun

hai jo zban par nam kisi ka

tere qurban achchhe saqi

pher na KHali jam kisi ka

manzil-e-haq mein teri ana kyon

bhul na ja anjam kisi ka

rah-e-wafa aasan nahin hai

pahle daman tham kisi ka

mere hamesha kaam aaya hai

har mushkil mein nam kisi ka

wo bhi koi banda jo 'kaamil'

subh kisi ka sham kisi ka