nafas bhi tez-tar aur dil bhi masruf-e-fughan mera

nafas bhī tez-tar aur dil bhī masrūf-e-fuġhāñ merā

payām-e-vasl hai shāyad ġham-e-soz-e-nihāñ merā

vahāñ ab khīñch kar laayā mujhe dard-e-nihāñ merā

jahāñ kā zarra zarra ho gayā hai jāñ-sitāñ merā

vahī manzil jise sab manzil-e-maqsūd kahte haiñ

usī manzil pe luuTā jā rahā hai kārvāñ merā

kabhī sayyād kā ḳhadsha kabhī bijlī kā andesha

ba-alfāz-e-digar merī ajal hai āshiyāñ merā

jabīn-e-shauq merī aur raushan hotī jaatī hai

dar-e-mahbūb jis din se banā hai āstāñ merā

jo girnā hai tujhe ai barq to ye soch kar girnā

ki hai saare chaman kī jaan goyā āshiyāñ merā

'azīz' ik din suḳhan-goī se shohrā hone vaalā hai

idhar merā udhar merā yahāñ merā vahāñ merā

nafas bhi tez-tar aur dil bhi masruf-e-fughan mera

payam-e-wasl hai shayad gham-e-soz-e-nihan mera

wahan ab khinch kar laya mujhe dard-e-nihan mera

jahan ka zarra zarra ho gaya hai jaan-sitan mera

wahi manzil jise sab manzil-e-maqsud kahte hain

usi manzil pe luTa ja raha hai karwan mera

kabhi sayyaad ka KHadsha kabhi bijli ka andesha

ba-alfaz-e-digar meri ajal hai aashiyan mera

jabin-e-shauq meri aur raushan hoti jati hai

dar-e-mahbub jis din se bana hai aastan mera

jo girna hai tujhe ai barq to ye soch kar girna

ki hai sare chaman ki jaan goya aashiyan mera

'aziz' ek din suKHan-goi se shohra hone wala hai

idhar mera udhar mera yahan mera wahan mera