nahin aashna mere haal se koi aankh bazm-e-majaz mein

nahīñ āshnā mire haal se koī aañkh bazm-e-majāz meñ

huuñ vo ā.īna jo hai nā-tamām abhī zehn-e-ā.īna-sāz meñ

yahī raaz thā ki haqīqateñ rahīñ raaz bazm-e-majāz meñ

vahī ġhaznavī kī nazar meñ thī jo girah thī zulf-e-ayāz meñ

mirā dāġh-e-sajda miTā.e kyuuñ falak us ko chāñd banā.e kyuuñ

ki ye daaġh hāsil-e-āshiqī hai mirī jabīn-e-niyāz meñ

na ye sham.a-e-bazm-faroz ho na ye zindagī na ye soz ho

jo nigāh-e-garm-asar tirī na bhare navā mire saaz meñ

ye rukū kyā ye qayām kyā ye sujūd kyā ye salām kyā

faqat ik fareb-e-niyāz hai jo na mahviyat ho namāz meñ

tirā naġhma mauj-e-shaguftagī mirā naala sho.ala-e-zindagī

hai yahī to farq muġhanniya mire soz meñ tire saaz meñ

huā ḳhaak zauq-e-niyāz se tū samajh na ye ki haqīr huuñ

mujhe jazb hone kā shauq hai tirī bazm-e-zarra-navāz meñ

nahīñ aañkh jalva-kash-e-sahar ye hai zulmatoñ kā asar magar

ka.ī āftāb ġhurūb haiñ mire ġham kī shām-e-darāz meñ

vo urūj-e-māh vo chāñdnī vo ḳhamosh raat vo be-ḳhudī

vo tasavvurāt kī sarḳhushī tire saath rāz-o-niyāz meñ

mujhe ḳhū-e-tuaba nahīñ to kyā mire jurm baḳhshe na jā.eñge

abhī aur chāhiyeñ vus.ateñ karam-e-bahāna-navāz meñ

arabī nahīñ ajamī sahī magar aarzū hai ki 'vārisī'

kabhī apnā naġhma-e-mashriqī maiñ sunūñ navā-e-hijāz meñ

nahin aashna mere haal se koi aankh bazm-e-majaz mein

hun wo aaina jo hai na-tamam abhi zehn-e-aina-saz mein

yahi raaz tha ki haqiqaten rahin raaz bazm-e-majaz mein

wahi ghaznawi ki nazar mein thi jo girah thi zulf-e-ayaz mein

mera dagh-e-sajda miTae kyun falak us ko chand banae kyun

ki ye dagh hasil-e-ashiqi hai meri jabin-e-niyaz mein

na ye shama-e-bazm-faroz ho na ye zindagi na ye soz ho

jo nigah-e-garm-asar teri na bhare nawa mere saz mein

ye ruku kya ye qayam kya ye sujud kya ye salam kya

faqat ek fareb-e-niyaz hai jo na mahwiyat ho namaz mein

tera naghma mauj-e-shaguftagi mera nala shoala-e-zindagi

hai yahi to farq mughanniya mere soz mein tere saz mein

hua KHak zauq-e-niyaz se tu samajh na ye ki haqir hun

mujhe jazb hone ka shauq hai teri bazm-e-zarra-nawaz mein

nahin aankh jalwa-kash-e-sahar ye hai zulmaton ka asar magar

kai aaftab ghurub hain mere gham ki sham-e-daraaz mein

wo uruj-e-mah wo chandni wo KHamosh raat wo be-KHudi

wo tasawwuraat ki sarKHushi tere sath raaz-o-niyaz mein

mujhe KHu-e-tuaba nahin to kya mere jurm baKHshe na jaenge

abhi aur chahiyen wusaten karam-e-bahana-nawaz mein

arabi nahin ajami sahi magar aarzu hai ki 'warisi'

kabhi apna naghma-e-mashriqi main sunun nawa-e-hijaz mein