نہیں آشنا مرے حال سے کوئی آنکھ بزم مجاز میں

نہیں آشنا مرے حال سے کوئی آنکھ بزم مجاز میں

ہوں وہ آئینہ جو ہے ناتمام ابھی ذہن آئینہ ساز میں

یہی راز تھا کہ حقیقتیں رہیں راز بزم مجاز میں

وہی غزنوی کی نظر میں تھی جو گرہ تھی زلف ایاز میں

مرا داغ سجدہ مٹائے کیوں فلک اس کو چاند بنائے کیوں

کہ یہ داغ حاصل عاشقی ہے مری جبین نیاز میں

نہ یہ شمع بزم فروز ہو نہ یہ زندگی نہ یہ سوز ہو

جو نگاہ گرم اثر تری نہ بھرے نوا مرے ساز میں

یہ رکوع کیا یہ قیام کیا یہ سجود کیا یہ سلام کیا

فقط اک فریب نیاز ہے جو نہ محویت ہو نماز میں

ترا نغمہ موج شگفتگی مرا نالہ شعلۂ زندگی

ہے یہی تو فرق مغنیہ مرے سوز میں ترے ساز میں

ہوا خاک ذوق نیاز سے تو سمجھ نہ یہ کہ حقیر ہوں

مجھے جذب ہونے کا شوق ہے تری بزم ذرہ نواز میں

نہیں آنکھ جلوہ کش سحر یہ ہے ظلمتوں کا اثر مگر

کئی آفتاب غروب ہیں مرے غم کی شام دراز میں

وہ عروج ماہ وہ چاندنی وہ خموش رات وہ بے خودی

وہ تصورات کی سر خوشی ترے ساتھ راز و نیاز میں

مجھے خوئے توبہ نہیں تو کیا مرے جرم بخشے نہ جائیں گے

ابھی اور چاہئیں وسعتیں کرم بہانہ نواز میں

عربی نہیں عجمی سہی مگر آرزو ہے کہ وارثیؔ

کبھی اپنا نغمۂ مشرقی میں سنوں نوائے حجاز میں