zulf-e-pechan yar ki jis waqt wa ho jaegi

zulf-e-pechāñ yaar kī jis vaqt vā ho jā.egī

chāhne vāloñ pe nāzil ik balā ho jā.egī

jis ko ulfat aap se ai dilrubā ho jā.egī

us kā dil kyā jaan bhī nazr adā ho jā.egī

ho chukā ḳhūn-e- tamannā ārzūeñ miT chukīñ

aap se milne kī hasrat bhī fanā ho jā.egī

sun ke sehat ko mirī kahtā hai vo rashk-e-masīh

kyā ḳhabar thī mudda.ā merī duā ho jā.egī

kyā zarūrat teġh-e-burrāñ kī hai ai qātil mujhe

qatl-e-āshiq ke liye kaafī adā ho jā.egī

ārzūeñ dil kī jitnī haiñ nikal jā.eñgī sab

aap kī chashm-e-ināyat jab zarā ho jā.egī

ai 'na.īm' un ko na parde meñ tum dekhnā

ārzū-e-dīd aur us se sivā ho jā.egī

zulf-e-pechan yar ki jis waqt wa ho jaegi

chahne walon pe nazil ek bala ho jaegi

jis ko ulfat aap se ai dilruba ho jaegi

us ka dil kya jaan bhi nazr ada ho jaegi

ho chuka KHun-e- tamanna aarzuen miT chukin

aap se milne ki hasrat bhi fana ho jaegi

sun ke sehat ko meri kahta hai wo rashk-e-masih

kya KHabar thi muddaa meri dua ho jaegi

kya zarurat tegh-e-burran ki hai ai qatil mujhe

qatl-e-ashiq ke liye kafi ada ho jaegi

aarzuen dil ki jitni hain nikal jaengi sab

aap ki chashm-e-inayat jab zara ho jaegi

ai 'naim' un ko na parde mein tum dekhna

aarzu-e-did aur us se siwa ho jaegi