kya qiyamat hai ki hum jaan se jate bhi nahin

kyā qiyāmat hai ki ham jaan se jaate bhī nahīñ

un ke aane kā koī lutf uThāte bhī nahīñ

hañs ke kahnā ruḳh-e-zebā to dikhāte bhī nahīñ

bijliyāñ ḳhirman-e-hastī pe girāte bhī nahīñ

haaye kyā be-kHudī-e-shauq ne aafat Dhaa.ī

vo chale aate haiñ ham hosh meñ aate bhī nahīñ

hai vo hañgāma fazā zo.af ki ab dast-e-junūñ

dhajjiyāñ jaib-o-garebāñ kī uḌāte bhī nahīñ

naale kyā zo.af se pahuñcheñge dar-e-jānāñ tak

pāya-e-arsh-e-barīñ aaj hilāte bhī nahīñ

fikr bhī chārā-gar-e-dil ko hai sehat kī mere

mujh se jo ruuTh gayā us ko manāte bhī nahīñ

chand qatre the magar ashk-e-nadāmat ke the

dhabbe us dāman-e-isyāñ ke miTāte bhī nahīñ

najm kis haal ko pahūñchā alam-e-be-tābī

ḳhaak tum dasht-e-mohabbat kī uḌāte bhī nahīñ

kya qiyamat hai ki hum jaan se jate bhi nahin

un ke aane ka koi lutf uThate bhi nahin

hans ke kahna ruKH-e-zeba to dikhate bhi nahin

bijliyan KHirman-e-hasti pe giraate bhi nahin

haye kya be-kHudi-e-shauq ne aafat Dhai

wo chale aate hain hum hosh mein aate bhi nahin

hai wo hangama faza zoaf ki ab dast-e-junun

dhajjiyan jaib-o-gareban ki uDate bhi nahin

nale kya zoaf se pahunchenge dar-e-jaanan tak

paya-e-arsh-e-barin aaj hilate bhi nahin

fikr bhi chaara-gar-e-dil ko hai sehat ki mere

mujh se jo ruTh gaya us ko manate bhi nahin

chand qatre the magar ashk-e-nadamat ke the

dhabbe us daman-e-isyan ke miTate bhi nahin

najm kis haal ko pahuncha alam-e-be-tabi

KHak tum dasht-e-mohabbat ki uDate bhi nahin