tasawwur ka asar baDh kar gale ka haar ho jae

tasavvur kā asar baḌh kar gale kā haar ho jaa.e

idhar parda sarak jaa.e udhar dīdār ho jaa.e

ai vaa.iz tuuhī kar insāf vo sajde kā kyā kahnā

ki jo sajda sarāpā naqsh-e-pā-e-yār ho jaa.e

mujhe mahfil se apnī isliye shāyad nikālā hai

kahīñ aisā na ho ye vāqif-e-asrār ho jaa.e

nigāh-e-yār merī zindagī kā ḳhātma kar de

makāñ se tiir nikle aur jigar ke paar ho jaa.e

mohabbat ke samundar meñ koī Duube koī ubhre

koī is paar rah jaa.e koī us paar ho jaa.e

dabe-pāñv chale aate haiñ turbat par mirī 'nāzāñ'

unheñ Dar hai kahīñ soyā huā hushyār ho jaa.e

tasawwur ka asar baDh kar gale ka haar ho jae

idhar parda sarak jae udhar didar ho jae

ai waiz tuhi kar insaf wo sajde ka kya kahna

ki jo sajda sarapa naqsh-e-pa-e-yar ho jae

mujhe mahfil se apni isliye shayad nikala hai

kahin aisa na ho ye waqif-e-asrar ho jae

nigah-e-yar meri zindagi ka KHatma kar de

makan se tir nikle aur jigar ke par ho jae

mohabbat ke samundar mein koi Dube koi ubhre

koi is par rah jae koi us par ho jae

dabe-panw chale aate hain turbat par meri 'nazan'

unhen Dar hai kahin soya hua hushyar ho jae