kahun kya allah allah kya maze ka dard hota hai

kahūñ kyā allāh allāh kyā maze kā dard hotā hai

jise mahbūb ḳhud baḳhshe vo mīThā dard hotā hai

qasam allāh kī pahlī nazar hai kis qiyāmat kī

mujhe to ibtidā meñ intihā kā dard hotā hai

tire jalve nazar aate haiñ jab taḌpā hai dil merā

davā hotī hai paidā jab bhī paidā dard hotā hai

mere dil kī taḌap kā kyā karegā koī andāzā

ayaañ hai husn par kis dil meñ kaisā dard hotā hai

merī be-tābī-e-dil par kisī kā hañs ke ye kahnā

sunā hai aap ke dil meñ balā kā dard hotā hai

ye naḳhl-e-ārzū haiñ yā mere dil ke phaphūle haiñ

mere jism-e-tamannā meñ ġhazab kā dard hotā hai

jahāñ kī ne.amatoñ meñ be-bahā ne.amat hai ai 'nāzāñ'

vo dil insāniyat kā jis meñ paidā dard hotā hai

kahun kya allah allah kya maze ka dard hota hai

jise mahbub KHud baKHshe wo miTha dard hota hai

qasam allah ki pahli nazar hai kis qiyamat ki

mujhe to ibtida mein intiha ka dard hota hai

tere jalwe nazar aate hain jab taDpa hai dil mera

dawa hoti hai paida jab bhi paida dard hota hai

mere dil ki taDap ka kya karega koi andaza

ayan hai husn par kis dil mein kaisa dard hota hai

meri be-tabi-e-dil par kisi ka hans ke ye kahna

suna hai aap ke dil mein bala ka dard hota hai

ye naKHl-e-arzu hain ya mere dil ke phaphule hain

mere jism-e-tamanna mein ghazab ka dard hota hai

jahan ki neamaton mein be-baha neamat hai ai 'nazan'

wo dil insaniyat ka jis mein paida dard hota hai