nazar mein bhi nahin ab ghumta paimana barson se

nazar meñ bhī nahīñ ab ghūmtā paimāna barsoñ se

qasam khāne ko bhī dekhā nahīñ mai-ḳhāna barsoñ se

na piine ko milī ik ghūñT be-bākāna barsoñ se

nahīñ ab kār-farmā jur.at-e-rindāna barsoñ se

sar-e-sahrā jidhar dekho udāsī hī udāsī hai

idhar aayā nahīñ shāyad koī dīvāna barsoñ se

kabhī ḳhalvat kabhī jalvat kabhī hañsnā kabhī ronā

murattab kar rahe haiñ ham bhī ik afsāna barsoñ se

ye taklīf-e-qadam-bosī ye andāz-e-pazīrā.ī

hamārā muntazir thā ġhāliban vīrāna barsoñ se

muyassar aa.ī kyā ham ko gadā.ī aap ke dar kī

guzartī hai hamārī zindagī shāhāna barsoñ se

vo apnī zaat ke sahrā meñ shāyad terā juuyā hai

nazar aayā nahīñ ahbāb ko dīvāna barsoñ se

'nasīr' ab apnī āñkheñ uTh nahīñ saktīñ kisī jānib

mire peash-e-nazar hai ik tajallī-ḳhāna barsoñ se

nazar mein bhi nahin ab ghumta paimana barson se

qasam khane ko bhi dekha nahin mai-KHana barson se

na pine ko mili ek ghunT be-bakana barson se

nahin ab kar-farma jurat-e-rindana barson se

sar-e-sahra jidhar dekho udasi hi udasi hai

idhar aaya nahin shayad koi diwana barson se

kabhi KHalwat kabhi jalwat kabhi hansna kabhi rona

murattab kar rahe hain hum bhi ek afsana barson se

ye taklif-e-qadam-bosi ye andaz-e-pazirai

hamara muntazir tha ghaaliban virana barson se

muyassar aai kya hum ko gadai aap ke dar ki

guzarti hai hamari zindagi shahana barson se

wo apni zat ke sahra mein shayad tera juya hai

nazar aaya nahin ahbab ko diwana barson se

'nasir' ab apni aankhen uTh nahin saktin kisi jaanib

mere peash-e-nazar hai ek tajalli-KHana barson se