nigahon ke muqabil jab maqam-e-ku-e-yar aaya

nigāhoñ ke muqābil jab maqām-e-kū-e-yār aayā

tasavvur par fidā hone ko ka.aba bār-bār aayā

ḳhudā rakhe tirā dāman yahāñ tak sāzgār aayā

rahe apne to apne jān-e-jāñ ġhairoñ ko pyaar aayā

na aa.e kaam chāra-gar na aa.iiñ raas tadbīreñ

tum aa.e sāmne dil ko sukūñ aayā qarār aayā

nikal aa.e harīm-e-nāz se ghabrā ke bil-āḳhir

taḌap kar naam jab un kā zabāñ par bār-bār aayā

jabīn-e-shauq ne itrā ke pai-dar-pai kiye sajde

adā se jhūmtā aage jo vo rashk-e-bahār ayā

jahāñ se be-ta'alluq ho ke jab ḳhud ko miTā Daalā

to us ġhārat-gar-e-īmāñ ko mujh par e'tibār aayā

mirā husn-e-taḳhyyul 'arsh ke pardoñ se Takrāyā

tirī ma.asūm nazroñ ko kabhī mujh par jo pyaar aayā

huā 'manzūr' be-shak bakHt-āvar vo ghaḌī bhar meñ

tirī ulfat kā saudā le ke jo umīd-vār aayā

nigahon ke muqabil jab maqam-e-ku-e-yar aaya

tasawwur par fida hone ko kaba bar-bar aaya

KHuda rakhe tera daman yahan tak sazgar aaya

rahe apne to apne jaan-e-jaan ghairon ko pyar aaya

na aae kaam chaara-gar na aain ras tadbiren

tum aae samne dil ko sukun aaya qarar aaya

nikal aae harim-e-naz se ghabra ke bil-aKHir

taDap kar nam jab un ka zaban par bar-bar aaya

jabin-e-shauq ne itra ke pai-dar-pai kiye sajde

ada se jhumta aage jo wo rashk-e-bahaar aya

jahan se be-ta'alluq ho ke jab KHud ko miTa Dala

to us ghaarat-gar-e-iman ko mujh par e'tibar aaya

mera husn-e-taKHyyul 'arsh ke pardon se Takraya

teri masum nazron ko kabhi mujh par jo pyar aaya

hua 'manzur' be-shak bakHt-awar wo ghaDi bhar mein

teri ulfat ka sauda le ke jo umid-war aaya