nikhar saka na badan chandni mein sone se

nikhar sakā na badan chāñdnī meñ sone se

sahr huī to ḳharāsheñ chunīñ bichhaune se

sadaf liye hue ubhrī hai laash bhī merī

bachā rahe the mujhe log ġharq hone se

hunar hai tujh meñ to qaa.il bhī kar zamāne ko

chamak uThegī na shakl aa.ine ko dhone se

lipaT rahī haiñ mire rāstoñ se raushaniyāñ

nazar meñ log haiñ kuchh sāñvle salone se

lagā ke zaḳhm bahāne chalā hai ab aañsū

rukā hai ḳhuun kahīñ paTTiyāñ bhigone se

hamīñ na hoñ kahīñ dekho to ġhaur se logo

haiñ tifl-e-vaqt ke hāthoñ meñ kuchh khilaune se

mire dukhoñ se bhī kuchh fā.eda uThā duniyā

zamīñ kī pyaas bujhe bādaloñ ke rone se

lahū ragoñ meñ 'muzaffar' chhuḌā.e mahtābī

mile hai kyā use chiñgāriyāñ chubhone se

nikhar saka na badan chandni mein sone se

sahr hui to KHarashen chunin bichhaune se

sadaf liye hue ubhri hai lash bhi meri

bacha rahe the mujhe log gharq hone se

hunar hai tujh mein to qail bhi kar zamane ko

chamak uThegi na shakl aaine ko dhone se

lipaT rahi hain mere raston se raushaniyan

nazar mein log hain kuchh sanwle salone se

laga ke zaKHm bahane chala hai ab aansu

ruka hai KHun kahin paTTiyan bhigone se

hamin na hon kahin dekho to ghaur se logo

hain tifl-e-waqt ke hathon mein kuchh khilaune se

mere dukhon se bhi kuchh faeda uTha duniya

zamin ki pyas bujhe baadalon ke rone se

lahu ragon mein 'muzaffar' chhuDae mahtabi

mile hai kya use chingariyan chubhone se