nikle wo phul ban ke tere gulsitāñ se hum

nikle vo phuul ban ke tire gulsitāñ se ham

mahkā diyā fazāoñ ko guzre jahāñ se ham

ab to yahī harīm-e-mohabbat hai ai sanam

jaa.eñ kahāñ ab uTh ke tire āstāñ se ham

duniyā meñ ab kahīñ bhī Thahartī nahīñ nazar

tujh sā hasīn laa.eñ to laa.eñ kahāñ se ham

dil le ke jis ne dard-e-mohabbat atā kiyā

māñgeñge ab davā bhī usī mehrbāñ se ham

dāman meñ kuchh to Daal de apne karam kī bhiik

dāman tahī na jā.eñge us āstāñ se ham

terā karam rahā jo rah-e-ishq meñ sanam

ik rose aa mileñge tire kārvāñ se ham

likkhī huī thī qaid-e-anāsir nasīb meñ

le kar chale haiñ apnā qafas āshiyāñ se ham

rāh-e-junūñ meñ khilne lage āshiqī ki phuul

un ke karam ke saa.e meñ guzre jahāñ se ham

Thukrā.eñ yā navāz leñ vo ham ko ai 'fanā'

shikva kabhī kareñge na apnī zabāñ se ham

nikle wo phul ban ke tere gulsitāñ se hum

mahkā diyā fazāoñ ko guzre jahāñ se hum

ab to yahī harīm-e-mohabbat hai ai sanam

jaeñ kahāñ ab uTh ke tere āstāñ se hum

duniyā meñ ab kahīñ bhī Thahartī nahīñ nazar

tujh sā hasīn laeñ to laeñ kahāñ se hum

dil le ke jis ne dard-e-mohabbat atā kiyā

māñgeñge ab dawā bhī usī mehrbāñ se hum

dāman meñ kuchh to Dal de apne karam kī bhik

dāman tahī na jāeñge us āstāñ se hum

terā karam rahā jo rah-e-ishq meñ sanam

ek rose aa mileñge tere kārwāñ se hum

likkhī huī thī qaid-e-anāsir nasīb meñ

le kar chale haiñ apnā qafas āshiyāñ se hum

rāh-e-junūñ meñ khilne lage āshiqī ki phul

un ke karam ke sae meñ guzre jahāñ se hum

Thukrāeñ yā nawāz leñ wo hum ko ai 'fanā'

shikwa kabhī kareñge na apnī zabāñ se hum