chaunke na irade jab dil mein wahshat ko jamahi aati to kya

chauñke na irāde jab dil meñ vahshat ko jamāhī aatī to kyā

jab us ke aañsū gul-rū-e-sabze ne jo lī añgḌā.ī to kyā

hañs-hañs ke jafā jab kahtī thī tab ek ne tujh ko daad na dī

ab merī kahānī ro-ro ke mahfil ne tirī dohrā.ī to kiyā

jab yaas kā ġhāza maut aa ke bīmār ke muñh par malne lagī

tab aas na aakar bālīñ par jo zulf-e-siyah lahrā.ī to kyā

baaqī na rahī jab dil meñ mire vo baada ba-jāmī kī hasrat

ġhunchoñ ne jo sāġhar toḌ diye phūloñ ne jo mai chhalkā.ī to kyā

ab aaj mirī be-hālī par aatā jo taras to baat bhī thī

kal apne kiye par baa'd mire duniyā-e-sitam pachhtā.ī to kyā

tum Dar se shikast-e-dil kī mire ġhairoñ se na hañsnā band karo

hañste hue ġhunchoñ ke aage ik aadh kalī murjhā.ī to kyā

kis be-kas-e-ġham kī pyaas bujhī kis dil ke hue sho'le ThanDe

yak buuñd lahū kī palkoñ se hoñToñ pe Dhalak kar aa.ī to kyā

lahkātī thī jis ke 'āriz pe kal bād-e-bahārī sho'le se

ab aaj ḳhizāñ meñ us gul kī hotī hai agar rusvā.ī to kyā

jab din kī ‘niyāz’-e-be-himmat dhūpoñ se jagā.e jag na sakā

ab kHunukī-e-shab ke lorī se lī us ne agar añgḌā.ī to kyā

chaunke na irade jab dil mein wahshat ko jamahi aati to kya

jab us ke aansu gul-ru-e-sabze ne jo li angDai to kya

hans-hans ke jafa jab kahti thi tab ek ne tujh ko dad na di

ab meri kahani ro-ro ke mahfil ne teri dohrai to kiya

jab yas ka ghaza maut aa ke bimar ke munh par malne lagi

tab aas na aakar baalin par jo zulf-e-siyah lahrai to kya

baqi na rahi jab dil mein mere wo baada ba-jami ki hasrat

ghunchon ne jo saghar toD diye phulon ne jo mai chhalkai to kya

ab aaj meri be-haali par aata jo taras to baat bhi thi

kal apne kiye par ba'd mere duniya-e-sitam pachhtai to kya

tum Dar se shikast-e-dil ki mere ghairon se na hansna band karo

hanste hue ghunchon ke aage ek aadh kali murjhai to kya

kis be-kas-e-gham ki pyas bujhi kis dil ke hue sho'le ThanDe

yak bund lahu ki palkon se honTon pe Dhalak kar aai to kya

lahkati thi jis ke 'ariz pe kal baad-e-bahaari sho'le se

ab aaj KHizan mein us gul ki hoti hai agar ruswai to kya

jab din ki ‘niyaz’-e-be-himmat dhupon se jagae jag na saka

ab kHunuki-e-shab ke lori se li us ne agar angDai to kya