tahzib-e-imarat roz nae andaz-e-shabistan badlegi

tahzīb-e-imārat roz na.e andāz-e-shabistāñ badlegī

ai dost magar shāyad ye kabhī duniyā-e-ġharībāñ badlegī

tarmīm-o-taġhayyur ke fitne uThte haiñ faqat aivānoñ meñ

badlī hai na hargiz kaifīyat kāshāna-e-vīrāñ badlegī

ummīd-e-bahārāñ se pahle ye baat hameñ mā'lūm na thī

mausam kī tarah har jumbish par taqdīr-e-gulistāñ badlegī

dikhlā.egā jazb-e-ulfat bhī andāz-e-zamāna-sāzī ke

ab maslahatan fitrat apnī āh-e-dil-e-sozāñ badlegī

majbūr kī aahoñ kā tūfāñ ik roz qayāmat lā.egā

ḳhud mashq-e-sitam se tañg aake rukH-e-gardish-e-daurāñ badlegā

allāh talab kī rāhoñ meñ taskīn kī manzil bhī hai kahīñ

ākHir ye kahāñ tak vahshat-e-dil sahrā-o-bayābāñ badlegī

marham se namak-dāñ tak to hameñ pahuñchāyā sukūn-e-rāhat ne

ai chāra-garo ab kaun-sā ruḳh ye kāvish-e-darmāñ badlegī

ehsān-e-sitam ke afsāne duniyā meñ raheñge apnī jagah

'unvān kī had tak rūdād-e-hālāt-e-pareshāñ badlegī

socho to 'niyāz'-e-zār zarā us vaqt kā 'ālam kyā hogā

kHunukī-e-sukūn-e-yās meñ jab ye sozish-e-pinhāñ badlegī

tahzib-e-imarat roz nae andaz-e-shabistan badlegi

ai dost magar shayad ye kabhi duniya-e-ghariban badlegi

tarmim-o-taghayyur ke fitne uThte hain faqat aiwanon mein

badli hai na hargiz kaifiyat kashana-e-viran badlegi

ummid-e-bahaaran se pahle ye baat hamein ma'lum na thi

mausam ki tarah har jumbish par taqdir-e-gulistan badlegi

dikhlaega jazb-e-ulfat bhi andaz-e-zamana-sazi ke

ab maslahatan fitrat apni aah-e-dil-e-sozan badlegi

majbur ki aahon ka tufan ek roz qayamat laega

KHud mashq-e-sitam se tang aake rukH-e-gardish-e-dauran badlega

allah talab ki rahon mein taskin ki manzil bhi hai kahin

aakHir ye kahan tak wahshat-e-dil sahra-o-bayaban badlegi

marham se namak-dan tak to hamein pahunchaya sukun-e-rahat ne

ai chaara-garo ab kaun-sa ruKH ye kawish-e-darman badlegi

ehsan-e-sitam ke afsane duniya mein rahenge apni jagah

'unwan ki had tak rudad-e-haalat-e-pareshan badlegi

socho to 'niyaz'-e-zar zara us waqt ka 'alam kya hoga

kHunuki-e-sukun-e-yas mein jab ye sozish-e-pinhan badlegi