aisa lagta hai ke rakha hai diya pani par

aisā lagtā hai ke rakhā hai diyā paanī par

varna kyuuñ ek dhamākā sā huā paanī par

ek ik mauj ba-sad shauq qadam chūmtī hai

jab ho masrūf-e-safar raḳhsh-e-navā paanī par

mujh ko tanhā jo safar karte hue dekhā to

ik tasavvur bhī mere saath chalā paanī par

tum ne sochā hai kabhī kyā tumheñ ma.alūm hai kuchh

kheltī rahtī hai kyuuñ bād-e-sabā paanī par

ek tālāb kināre meñ khaḌā dekhtā huuñ

kaa.ī hai yā hai koī sabz-ridā paanī par

tesha-e-mauj use mismār bhī kar saktā hai

sun mere yaar koī ghar na banā paanī par

machhliyāñ aa ga.iiñ ai 'nūr' salāmī dene

us ne phūñkī thī abhī koī duā paanī par

aisa lagta hai ke rakha hai diya pani par

warna kyun ek dhamaka sa hua pani par

ek ek mauj ba-sad shauq qadam chumti hai

jab ho masruf-e-safar raKHsh-e-nawa pani par

mujh ko tanha jo safar karte hue dekha to

ek tasawwur bhi mere sath chala pani par

tum ne socha hai kabhi kya tumhein malum hai kuchh

khelti rahti hai kyun baad-e-saba pani par

ek talab kinare mein khaDa dekhta hun

kai hai ya hai koi sabz-rida pani par

tesha-e-mauj use mismar bhi kar sakta hai

sun mere yar koi ghar na bana pani par

machhliyan aa gain ai 'nur' salami dene

us ne phunki thi abhi koi dua pani par