mohabbat hosh se guzri to kuchh diwangi aai

mohabbat hosh se guzrī to kuchh dīvāngī aa.ī

jigar meñ dard uTThā ashk Tapke phir hañsī aa.ī

shikast-e-nāz farmā.ī hai yā takmīl-e-ra.anā.ī

adā.eñ mahv-e-ulfat ho ga.iiñ yā sādgī aa.ī

ḳhudā.ī mil rahī thī lekin us insāñ ne Thukrāyā

kuchh aisā jalva lekar us ke aage bandagī aa.ī

mujhe mahsūs karnā hī paḌā rabt-e-jamāl un kā

yahāñ tak mere naqsh aarzū meñ dil-kashī aa.ī

tū sajde māñgtā hai aur maiñ maġhrūr-e-tā'at huuñ

ḳhudā.ī tujh ko aa.ī aur na mujh ko bandagī aa.ī

jahāñ se 'ishq ne sanjīdgī bartī ġham-e-dil meñ

vahīñ se kuchh mizāj-e-husn meñ āshuftagī aa.ī

'nushūr' ik zindagī kā tajraba hai sher mauzūñ bhī

bahut dekhe ġham-e-hastī to thoḌī shā.irī aa.ī

mohabbat hosh se guzri to kuchh diwangi aai

jigar mein dard uTTha ashk Tapke phir hansi aai

shikast-e-naz farmai hai ya takmil-e-ranai

adaen mahw-e-ulfat ho gain ya sadgi aai

KHudai mil rahi thi lekin us insan ne Thukraya

kuchh aisa jalwa lekar us ke aage bandagi aai

mujhe mahsus karna hi paDa rabt-e-jamal un ka

yahan tak mere naqsh aarzu mein dil-kashi aai

tu sajde mangta hai aur main maghrur-e-ta'at hun

KHudai tujh ko aai aur na mujh ko bandagi aai

jahan se 'ishq ne sanjidgi barti gham-e-dil mein

wahin se kuchh mizaj-e-husn mein aashuftagi aai

'nushur' ek zindagi ka tajraba hai sher mauzun bhi

bahut dekhe gham-e-hasti to thoDi shairi aai