محبت ہوش سے گزری تو کچھ دیوانگی آئی

محبت ہوش سے گزری تو کچھ دیوانگی آئی

جگر میں درد اٹھا اشک ٹپکے پھر ہنسی آئی

شکست ناز فرمائی ہے یا تکمیل رعنائی

ادائیں محو الفت ہو گئیں یا سادگی آئی

خدائی مل رہی تھی لیکن اس انساں نے ٹھکرایا

کچھ ایسا جلوہ لے کر اس کے آگے بندگی آئی

مجھے محسوس کرنا ہی پڑا ربط جمال ان کا

یہاں تک میرے نقش آرزو میں دل کشی آئی

تو سجدے مانگتا ہے اور میں مغرور طاعت ہوں

خدائی تجھ کو آئی اور نہ مجھ کو بندگی آئی

جہاں سے عشق نے سنجیدگی برتی غم دل میں

وہیں سے کچھ مزاج حسن میں آشفتگی آئی

نشورؔ اک زندگی کا تجربہ ہے شعر موزوں بھی

بہت دیکھے غم ہستی تو تھوڑی شاعری آئی