duniya ko KHabar kya ki kisi sada ada ne

duniyā ko ḳhabar kyā ki kisī saada adā ne

ashk-e-pas-e-mizhgāñ se badal Daale zamāne

ḳhud jal ke murattab kiye mahfil ke fasāne

parvānoñ ko dāvat hī na dī sham-e’-hayā ne

rasta vahī shādāb milā lāla-o-gul se

jis raah ko sīñchā thā kisī ābla-pā ne

hastī kī taraf dekh ke hastī ko na dekhā

marnā bhī sikhāyā mujhe jiine kī adā ne

har raah meñ naqsh-e-kaf-e-pā garm-e-safar haiñ

kuchh kaam kiyā qāfila-e-bād-e-sabā ne

iḳhlās ko fursat na milī dair-e-butāñ se

ka'abe ko basāyā unhīñ sajdāt-e-riyā ne

pechāñ hai sar-e-rāh 'nushūr' aaj kī duniyā

vo gard uḌaa.ī hai zamāne kī havā ne

duniya ko KHabar kya ki kisi sada ada ne

ashk-e-pas-e-mizhgan se badal Dale zamane

KHud jal ke murattab kiye mahfil ke fasane

parwanon ko dawat hi na di sham-e’-haya ne

rasta wahi shadab mila lala-o-gul se

jis rah ko sincha tha kisi aabla-pa ne

hasti ki taraf dekh ke hasti ko na dekha

marna bhi sikhaya mujhe jine ki ada ne

har rah mein naqsh-e-kaf-e-pa garm-e-safar hain

kuchh kaam kiya qafila-e-baad-e-saba ne

iKHlas ko fursat na mili dair-e-butan se

ka'abe ko basaya unhin sajdat-e-riya ne

pechan hai sar-e-rah 'nushur' aaj ki duniya

wo gard uDai hai zamane ki hawa ne