uDa kar le gaya aks-e-ruKH-e-saqi wahan mujhko

uḌā kar le gayā 'aks-e-ruḳh-e-sāqī vahāñ mujh ko

milā TuuTā huā ā.īna-e-hastī jahāñ mujh ko

zamāna de rahā hai sab nizām-e-kun-fakāñ mujh ko

magar apnī sharāb-e-kaif se fursat kahāñ mujh ko

maiñ khoyā jā rahā huuñ jalva-e-nūr-e-takHayyul meñ

miTā.e jā rahī haiñ husn kī rañgīniyāñ mujh ko

sabā ke har tamavvuj meñ chaman ke har tabassum meñ

nazar aatī hai fitrat gulistāñ dar gulistāñ mujh ko

sharāb-e-dard se zauq āshnā ma'alūm hotā hai

'nushūr'-e-vāhidī kā kaif-e-andāz-e-bayāñ mujh ko

uDa kar le gaya 'aks-e-ruKH-e-saqi wahan mujh ko

mila TuTa hua aaina-e-hasti jahan mujh ko

zamana de raha hai sab nizam-e-kun-fakan mujh ko

magar apni sharab-e-kaif se fursat kahan mujh ko

main khoya ja raha hun jalwa-e-nur-e-takHayyul mein

miTae ja rahi hain husn ki ranginiyan mujh ko

saba ke har tamawwuj mein chaman ke har tabassum mein

nazar aati hai fitrat gulistan dar gulistan mujh ko

sharab-e-dard se zauq aashna ma'alum hota hai

'nushur'-e-wahidi ka kaif-e-andaz-e-bayan mujh ko