nigah-e-awwalin ka aaj tak jab nam aata hai

nigāh-e-avvalīñ kā aaj tak jab naam aatā hai

vahī ra’anā.iyāñ lekar ḳhayāl-e-ḳhām aatā hai

maiñ un jalvoñ meñ dast-e-shauq-o-sāġhar bhuul jaatā huuñ

koī rañgīñ adā lekar jo rañgīñ jaam aatā hai

tujhe ai husn-e-’ālam-soz āḳhir kab ḳhabar hogī

ki barbād-e-tamannā koī zer-e-bām aatā hai

musalsal shām-e-ġhurbat shām-e-furqat shām-e-bīmārī

mirā dil kaañp jaatā hai jo lafz-e-shām aatā hai

mohabbat aur phir zabt-e-mohabbat uf ma.āz-allāh

ḳhudā kā sāmnā hai aur kisī kā naam aatā hai

fareb-e-husn ko bhī yaad rakh ai tishna-e-'uqbā

tamāshā aaj kā dekhā huā kal kaam aatā hai

na pūchho zindagī tār-e-nafas par jiine vāloñ kī

ki marg-e-nā-gahāñ kā har nafas paiġhām aatā hai

'nushūr' un ke ġhurūr-e-husn kā dāman pakaḌ luuñ maiñ

magar merī kamand-e-shauq par ilzām aatā hai

nigah-e-awwalin ka aaj tak jab nam aata hai

wahi ra’anaiyan lekar KHayal-e-KHam aata hai

main un jalwon mein dast-e-shauq-o-saghar bhul jata hun

koi rangin ada lekar jo rangin jam aata hai

tujhe ai husn-e-’alam-soz aaKHir kab KHabar hogi

ki barbaad-e-tamanna koi zer-e-baam aata hai

musalsal sham-e-ghurbat sham-e-furqat sham-e-bimari

mera dil kanp jata hai jo lafz-e-sham aata hai

mohabbat aur phir zabt-e-mohabbat uf maaz-allah

KHuda ka samna hai aur kisi ka nam aata hai

fareb-e-husn ko bhi yaad rakh ai tishna-e-'uqba

tamasha aaj ka dekha hua kal kaam aata hai

na puchho zindagi tar-e-nafas par jine walon ki

ki marg-e-na-gahan ka har nafas paigham aata hai

'nushur' un ke ghurur-e-husn ka daman pakaD lun main

magar meri kamand-e-shauq par ilzam aata hai