نگاہ اولیں کا آج تک جب نام آتا ہے

نگاہ اولیں کا آج تک جب نام آتا ہے

وہی رعنائیاں لے کر خیال خام آتا ہے

میں ان جلووں میں دست شوق و ساغر بھول جاتا ہوں

کوئی رنگیں ادا لے کر جو رنگیں جام آتا ہے

تجھے اے حسن عالم سوز آخر کب خبر ہوگی

کہ برباد تمنا کوئی زیر بام آتا ہے

مسلسل شام غربت شام فرقت شام بیماری

مرا دل کانپ جاتا ہے جو لفظ شام آتا ہے

محبت اور پھر ضبط محبت اف معاذ اللہ

خدا کا سامنا ہے اور کسی کا نام آتا ہے

فریب حسن کو بھی یاد رکھ اے تشنۂ عقبیٰ

تماشا آج کا دیکھا ہوا کل کام آتا ہے

نہ پوچھو زندگی تار نفس پر جینے والوں کی

کہ مرگ ناگہاں کا ہر نفس پیغام آتا ہے

نشورؔ ان کے غرور حسن کا دامن پکڑ لوں میں

مگر میری کمند شوق پر الزام آتا ہے