dil-rubai ki haqiqat mere dard-e-dil mein hai

dil-rubā.ī kī haqīqat mere dard-e-dil meñ hai

husn agar pūchho to merī fitrat-e-kāmil meñ hai

dekhtā huuñ tujh ko yaksāñ jalva-gar donoñ jagah

maiñ nahīñ samjhā ki tū dil meñ hai yā mahfil meñ hai

jalva-farmā farq tujh meñ aur dil meñ kuchh nahīñ

terī manzil dil meñ hai aur dil tirī manzil meñ hai

jis ne dekhā hai tujhe hai vo tirā mahv-e-ḳhayāl

tū vo lailā hai ki hai ek aur sau mahmil meñ hai

allāh allāh kārsāzī 'ishq-e-'ālam-soz kī

kis qadar ḳhāmosh merī hastī-e-ġhāfil meñ hai

ḳhaas andāzoñ se har 'āshiq nahīñ vāqif 'nushūr'

ik zamāna mahv us ke 'ishva-e-bātil meñ hai

dil-rubai ki haqiqat mere dard-e-dil mein hai

husn agar puchho to meri fitrat-e-kaamil mein hai

dekhta hun tujh ko yaksan jalwa-gar donon jagah

main nahin samjha ki tu dil mein hai ya mahfil mein hai

jalwa-farma farq tujh mein aur dil mein kuchh nahin

teri manzil dil mein hai aur dil teri manzil mein hai

jis ne dekha hai tujhe hai wo tera mahw-e-KHayal

tu wo laila hai ki hai ek aur sau mahmil mein hai

allah allah karsazi 'ishq-e-'alam-soz ki

kis qadar KHamosh meri hasti-e-ghafil mein hai

KHas andazon se har 'ashiq nahin waqif 'nushur'

ek zamana mahw us ke 'ishwa-e-baatil mein hai