KHub hai saqi jo teri nargisi chitwan mein hai

ḳhuub hai saaqī jo terī nargisī chitvan meñ hai

vo bhī thoḌī sī jo mīnā-e-rag-e-gardan meñ hai

allāh allāh husn roz-afzūñ kī bātin tābiyāñ

chāñd kī duniyā mirī taḳh.īl ke dāman meñ hai

chashm-e-bīnā DhūñDne vaale kahāñ tak justujū

parda uThe raushnī har dīda-e-sozan meñ hai

dil ke TukḌe uḌ ga.e hoñ yā jigar kī dhajjiyāñ

kuchh nahīñ suntā jo apnī lazzat-e-shevan meñ hai

aah bīmār-e-mohabbat uf asīr-e-ārzū

khich rahī hai ruuh lekin haath abhī gardan meñ hai

ye bahāreñ ye phuvāreñ aur ye meñdhī 'nushūr'

haaye vo kāfir javānī jo kisī sāvan meñ hai

KHub hai saqi jo teri nargisi chitwan mein hai

wo bhi thoDi si jo mina-e-rag-e-gardan mein hai

allah allah husn roz-afzun ki baatin tabiyan

chand ki duniya meri taKHil ke daman mein hai

chashm-e-bina DhunDne wale kahan tak justuju

parda uThe raushni har dida-e-sozan mein hai

dil ke TukDe uD gae hon ya jigar ki dhajjiyan

kuchh nahin sunta jo apni lazzat-e-shewan mein hai

aah bimar-e-mohabbat uf asir-e-arzu

khich rahi hai ruh lekin hath abhi gardan mein hai

ye bahaaren ye phuwaren aur ye meindhi 'nushur'

haye wo kafir jawani jo kisi sawan mein hai