paDh ke KHat yar ka kal maine banaya tawiz

paḌh ke ḳhat yaar kā kal maiñ ne banāyā ta.avīz

is se behtar koī al-hubb kā na paayā ta.avīz

garm-joshī se kisī din na milā mujh se vo

aag meñ jis ke liye maiñ ne jalāyā ta.avīz

shāyad us but kā dil-e-sañg kahīñ paanī ho

is liye bahr meñ likh likh ke bahāyā ta.avīz

ik amal bhī na chalā us pe mirā kyā kahiye

garche sau tarh mohabbat kā likhāyā ta.avīz

talkHī-e-koh-kunī se jo muvāshīrīñ ne

us kī turbat pe bhī mar mar kā lagāyā ta.avīz

chashm-e-baddūr nazar merī to hai us pe lagī

taar muqayyash se kyuuñ tū ne ḳhudāyā ta.avīz

haath se dil to liye kitne zabardastoñ ke

band-o-bast apne kā tū ne jo dikhāyā ta.avīz

bad-gumāñ mujh se ziyāda vo huā kuchh na banā

paas mere kahīñ us ko nazar aayā ta.avīz

le gayā toḌ mere baazū se jhaT-paT us ko

phir dikhāyā na mujhe aisā churāyā ta.avīz

na chalā merā kahā us se maiñ kahtā hī rahā

jaan merī koī letā hai parāyā ta.avīz

yaar merā na kabhī mujh se ḳhafā hove 'turāb'

mujh ko batlā de koī aisī duā yā ta.avīz

paDh ke KHat yar ka kal main ne banaya tawiz

is se behtar koi al-hubb ka na paya tawiz

garm-joshi se kisi din na mila mujh se wo

aag mein jis ke liye main ne jalaya tawiz

shayad us but ka dil-e-sang kahin pani ho

is liye bahr mein likh likh ke bahaya tawiz

ek amal bhi na chala us pe mera kya kahiye

garche sau tarh mohabbat ka likhaya tawiz

talkHi-e-koh-kuni se jo muwashirin ne

us ki turbat pe bhi mar mar ka lagaya tawiz

chashm-e-baddur nazar meri to hai us pe lagi

tar muqayyash se kyun tu ne KHudaya tawiz

hath se dil to liye kitne zabardaston ke

band-o-bast apne ka tu ne jo dikhaya tawiz

bad-guman mujh se ziyaada wo hua kuchh na bana

pas mere kahin us ko nazar aaya tawiz

le gaya toD mere bazu se jhaT-paT us ko

phir dikhaya na mujhe aisa churaya tawiz

na chala mera kaha us se main kahta hi raha

jaan meri koi leta hai paraya tawiz

yar merā na kabhi mujh se KHafa howe 'turab'

mujh ko batla de koi aisi dua ya tawiz