paDte hi teri ek chashm-e-karam kya arz karen kya bhul gae

paḌte hī tirī ik chashm-e-karam kyā arz kareñ kyā bhuul ga.e

apnā bhī hameñ ab hosh nahīñ ham arz-e-tamannā bhuul ga.e

ai chashm-e-fusūñ-gar kyā kahnā sar chaḌh ke tirā jaadū bole

qadmoñ pe tire ab ham haiñ paḌe ka.aba kā vo jaanā bhuul ga.e

dhoka thā ibādat aur taqvā ik khel thī ye dīn-o-duniyā

ab nām-e-ḳhudā bhī yaad nahīñ sab jān-e-tamannā bhuul ga.e

kūche meñ tire ai jān-e-ġhazal ye raaz khulā ham par aa kar

ġham bhī to ināyat hai terī ham ġham kā mudāvā bhuul ga.e

uTh ke añdherī rātoñ meñ ham tujh ko pukārā karte haiñ

har chiiz se nafrat ham ko huī ham jannat-e-fardā bhuul ga.e

'kāvish' pe vo Daalī tū ne nazar TuuTā vo fareb-e-hastī bhī

bas terī kahānī yaad rahī hastī kā fasāna bhuul ga.e

paDte hi teri ek chashm-e-karam kya arz karen kya bhul gae

apna bhi hamein ab hosh nahin hum arz-e-tamanna bhul gae

ai chashm-e-fusun-gar kya kahna sar chaDh ke tera jadu bole

qadmon pe tere ab hum hain paDe kaba ka wo jaana bhul gae

dhoka tha ibaadat aur taqwa ek khel thi ye din-o-duniya

ab nam-e-KHuda bhi yaad nahin sab jaan-e-tamanna bhul gae

kuche mein tere ai jaan-e-ghazal ye raaz khula hum par aa kar

gham bhi to inayat hai teri hum gham ka mudawa bhul gae

uTh ke andheri raaton mein hum tujh ko pukara karte hain

har chiz se nafrat hum ko hui hum jannat-e-farda bhul gae

'kawish' pe wo Dali tu ne nazar TuTa wo fareb-e-hasti bhi

bas teri kahani yaad rahi hasti ka fasana bhul gae