pasand aaya to le lo dil hamara

pasand aayā to le lo dil hamārā

magar dil phir bhī kis qābil hamārā

koī hai jo na ho hāmil hamārā

magar milnā huā mushkil hamārā

nahīñ hotā ki baḌh kar haath rakh deñ

taḌapnā dekhte haiñ dil hamārā

jamāl un kā hai āb-e-zindagānī

magar jiinā kiyā mushkil hamārā

chhurī bhī tez zālim ne na kar lī

baḌā be-rahm hai qātil hamārā

tamavvuj bahr-e-ġham kā dekhte ho

habāb-e-dil hai dariyā-dil hamārā

ye garmī ātish-e-dozaḳh meñ vaa.iz

koī naala huā shāmil hamārā

chalā saffāk ye jī meñ na aa.ī

taḌaptā hai abhī bismil hamārā

na aanā ham tumhārā dekh leñge

jo niklā jazb-e-dil kāmil hamārā

dil-e-gardūñ se le kar tā-dil-e-dost

gayā naala ka.ī manzil hamārā

tāmul hai jo paas aane meñ un ko

vahāñ jaanā bhī lā-hāsil hamārā

dam-e-naz.a aane kā va.ada to dekho

ki ab marnā bhī ho mushkil hamārā

agar qaabū na thā dil par burā thā

vahāñ jaanā sar-e-mahfil hamārā

bhalā vo dushman-e-jāñ dost hogā

huā pindār ab bātil hamārā

ye hālat hai to shāyad rahm aa.e

koī us ko dikhā de dil hamārā

muhīt-e-jalva-e-be-rañg hai dil

kahīñ paidā nahīñ sāhil hamārā

unhīñ kī chheḌ thī is rañg meñ bhī

ḳhayāl-e-ġhair thā bātil hamārā

talab un kī phireñ ham gird apne

junūn-e-ishq thā kāmil hamārā

mazā har aan meñ hai shān-e-nau kā

magar jab dil na ho ġhāfil hamārā

matā-e-garmī-e-bāzār-e-jāñ hai

vo barq-e-ḳhirman-e-hāsil hamārā

takallum ham se yāre-e-be-dahan kā

na kyuuñ ho mudda.ī qaa.el hamārā

kabhī ham ko na DhūñDhā tū ne ai qais

dil-e-har-zarra thā mahmil hamārā

muhīt-e-rañg nairañg-e-fanā haiñ

jamāl-e-dost hai sāhil hamārā

na jaanā kuchh tarāz-e-ganj-e-asrār

amānat-dār thā jāhil hamārā

vo kaash itnā qayāmat meñ to pūchheñ

kahāñ hai 'āsī'-e-be-dil hamārā

pasand aaya to le lo dil hamara

magar dil phir bhi kis qabil hamara

koi hai jo na ho hamil hamara

magar milna hua mushkil hamara

nahin hota ki baDh kar hath rakh den

taDapna dekhte hain dil hamara

jamal un ka hai aab-e-zindagani

magar jina kiya mushkil hamara

chhuri bhi tez zalim ne na kar li

baDa be-rahm hai qatil hamara

tamawwuj bahr-e-gham ka dekhte ho

habab-e-dil hai dariya-dil hamara

ye garmi aatish-e-dozaKH mein waiz

koi nala hua shamil hamara

chala saffak ye ji mein na aai

taDapta hai abhi bismil hamara

na aana hum tumhaara dekh lenge

jo nikla jazb-e-dil kaamil hamara

dil-e-gardun se le kar ta-dil-e-dost

gaya nala kai manzil hamara

tamul hai jo pas aane mein un ko

wahan jaana bhi la-hasil hamara

dam-e-naza aane ka wada to dekho

ki ab marna bhi ho mushkil hamara

agar qabu na tha dil par bura tha

wahan jaana sar-e-mahfil hamara

bhala wo dushman-e-jaan dost hoga

hua pindar ab baatil hamara

ye haalat hai to shayad rahm aae

koi us ko dikha de dil hamara

muhit-e-jalwa-e-be-rang hai dil

kahin paida nahin sahil hamara

unhin ki chheD thī is rang mein bhi

KHayal-e-ghair tha baatil hamara

talab un ki phiren hum gird apne

junun-e-ishq tha kaamil hamara

maza har aan mein hai shan-e-nau ka

magar jab dil na ho ghafil hamara

mata-e-garmi-e-bazar-e-jaan hai

wo barq-e-KHirman-e-hasil hamara

takallum hum se yare-e-be-dahan ka

na kyun ho muddai qael hamara

kabhī hum ko na DhunDha tu ne ai qais

dil-e-har-zarra tha mahmil hamara

muhit-e-rang nairang-e-fana hain

jamal-e-dost hai sahil hamara

na jaana kuchh taraaz-e-ganj-e-asrar

amanat-dar tha jahil hamara

wo kash itna qayamat mein to puchhen

kahan hai 'asi'-e-be-dil hamara