patthar mujhe sharminda-e-guftar na kar de

patthar mujhe sharminda-e-guftār na kar de

ūñchā mirī āvāz ko dīvār na kar de

majbūr-e-suḳhan kartā hai kyuuñ mujh ko zamāna

lahja mire jazbāt kā iz.hār na kar de

zanjīr samajh kar mujhe toḌā to hai tū ne

ab tujh ko pareshāñ mirī jhankār na kar de

chaltā huuñ to paḌte haiñ qadam mere havā par

Dartā huuñ havā chalne se inkār na kar de

rah jā.ūñ na maiñ apne hī qadmoñ se kuchal kar

pāmāl mujhe ḳhud mirī raftār na kar de

maiñ ḳhud ko miTā kar tirā shahkār banā huuñ

nīlām mujhe tū sar-e-bāzār na kar de

har saañs na.e zaḳhm lagātī hai 'muzaffar'

TukḌe mire ik roz ye talvār na kar de

patthar mujhe sharminda-e-guftar na kar de

uncha meri aawaz ko diwar na kar de

majbur-e-suKHan karta hai kyun mujh ko zamana

lahja mere jazbaat ka izhaar na kar de

zanjir samajh kar mujhe toDa to hai tu ne

ab tujh ko pareshan meri jhankar na kar de

chalta hun to paDte hain qadam mere hawa par

Darta hun hawa chalne se inkar na kar de

rah jaun na main apne hi qadmon se kuchal kar

pamal mujhe KHud meri raftar na kar de

main KHud ko miTa kar tera shahkar bana hun

nilam mujhe tu sar-e-bazar na kar de

har sans nae zaKHm lagati hai 'muzaffar'

TukDe mere ek roz ye talwar na kar de