silsila TuTe na saqi hosh uD jaane ke baad

silsila TuuTe na saaqī hosh uḌ jaane ke ba.ad

mujh ko miltā hī rahe paimāna paimāne ke ba.ad

kho diyā duniyā meñ jo kuchh thā tujhe paane ke ba.ad

jaan se jaanā paḌā ham ko tire aane ke ba.ad

tū hī thā vo sham.a jis kī raushnī thī har taraf

rañg mahfil meñ kahāñ ab tere uTh jaane ke ba.ad

jaao baiTho chain se maiñ kyā kahūñ tum kyā suno

ab pashemānī se kyā hāsil sitam Dhāne ke ba.ad

us kā kyā kahnā hai zāhid ke Thikāne haiñ bahut

ye kisī masjid meñ jā baiThegā mai-ḳhāne ke ba.ad

sham.a mahfil roye yā hañs kar guzāre sub.h tak

kaun ab jalne yahāñ aa.egā parvāne ke ba.ad

husn ruḳh kī ik jhalak ne kar diye ausān gum

hosh aayā to magar un ke chale jaane ke ba.ad

sach hai koī bhī sharīk-dard-o-ġham hotā nahīñ

ho ga.e ahbāb ruḳhsat mujh ko samjhāne ke ba.ad

ab to kahte ho ki jā merī nazar se duur ho

tum manāne aaoge mujh ko mire jaane ke ba.ad

tā.ir-e-dil ḳhaal to dekhā ḳham-e-gesū bhī dekh

daam bhī tujh ko nazar aa jā.egā daane ke ba.ad

vahshat-e-dil kī badaulat ham chale aa.e yahāñ

dekhiye ab kaun sī manzil hai vīrāne ke ba.ad

kaun rotā hai kisī kī ḳhasta-hālī par 'nasīr'

zer-e-lab hañstī hai duniyā mere luT jaane ke ba.ad

silsila TuTe na saqi hosh uD jaane ke baad

mujh ko milta hi rahe paimana paimane ke baad

kho diya duniya mein jo kuchh tha tujhe pane ke baad

jaan se jaana paDa hum ko tere aane ke baad

tu hi tha wo shama jis ki raushni thi har taraf

rang mahfil mein kahan ab tere uTh jaane ke baad

jao baiTho chain se main kya kahun tum kya suno

ab pashemani se kya hasil sitam Dhane ke baad

us ka kya kahna hai zahid ke Thikane hain bahut

ye kisi masjid mein ja baiThega mai-KHane ke baad

shama mahfil roye ya hans kar guzare subh tak

kaun ab jalne yahan aaega parwane ke baad

husn ruKH ki ek jhalak ne kar diye ausan gum

hosh aaya to magar un ke chale jaane ke baad

sach hai koi bhi sharik-dard-o-gham hota nahin

ho gae ahbab ruKHsat mujh ko samjhane ke baad

ab to kahte ho ki ja meri nazar se dur ho

tum manane aaoge mujh ko mere jaane ke baad

tair-e-dil KHal to dekha KHam-e-gesu bhi dekh

dam bhi tujh ko nazar aa jaega dane ke baad

wahshat-e-dil ki badaulat hum chale aae yahan

dekhiye ab kaun si manzil hai virane ke baad

kaun rota hai kisi ki KHasta-haali par 'nasir'

zer-e-lab hansti hai duniya mere luT jaane ke baad