un se har waqt meri aankh laDi rahti hai

un se har vaqt mirī aañkh laḌī rahtī hai

kyā laḌākā hai ki laḌne pe aḌī rahtī hai

dekh kar vaqt ke maqtal meñ mirī shān-e-varūd

Dar meñ qātil hī nahīñ maut khaḌī rahtī hai

terī tasvīr mire dil meñ nagīne kī tarah

jagmagātī hai chamaktī hai juḌī rahtī hai

log sach kahte haiñ pāmāl-e-mohabbat mujh ko

merī chāhat tire qadmoñ meñ paḌī rahtī hai

āfateñ laakh hoñ dekhā na kabhī chehra-e-yās

mujh ko allāh se ummīd baḌī rahtī hai

jo kabhī ḳhūn-e-shahīdāñ se hinā-band rahe

ab inhīñ phuul se hāthoñ meñ chhaḌī rahtī hai

yuuñ na itrā ki javānī bhī hai aanī jaanī

chāñdnī chāñd kī do chaar ghaḌī rahtī hai

girya-e-chashm kā ulfat meñ ye 'ālam hai 'nasīr'

koī mausam bhī ho sāvan kī jhaḌī rahtī hai

un se har waqt meri aankh laDi rahti hai

kya laDaka hai ki laDne pe aDi rahti hai

dekh kar waqt ke maqtal mein meri shan-e-warud

Dar mein qatil hi nahin maut khaDi rahti hai

teri taswir mere dil mein nagine ki tarah

jagmagati hai chamakti hai juDi rahti hai

log sach kahte hain pamal-e-mohabbat mujh ko

meri chahat tere qadmon mein paDi rahti hai

aafaten lakh hon dekha na kabhi chehra-e-yas

mujh ko allah se ummid baDi rahti hai

jo kabhi KHun-e-shahidan se hina-band rahe

ab inhin phul se hathon mein chhaDi rahti hai

yun na itra ki jawani bhi hai aani jaani

chandni chand ki do chaar ghaDi rahti hai

girya-e-chashm ka ulfat mein ye 'alam hai 'nasir'

koi mausam bhi ho sawan ki jhaDi rahti hai