kis tasawwur mein wo kho jate hain uThte baiThte

kis tasavvur meñ vo kho jaate haiñ uThte baiThte

apne jī meñ aap sharmāte haiñ uThte baiThte

paas rah kar jo sitam Dhāte haiñ uThte baiThte

jab chale jaa.eñ to yaad aate haiñ uThte baiThte

yuuñ ham apne dil ko bahlāte haiñ uThte baiThte

kū-e-jānāñ tak pahuñch jaate haiñ uThte baiThte

ab to vo rahne lage har vaqt mujh se bad-gumāñ

ho burā un kā jo bhaḌkāte haiñ uThte baiThte

fasl-e-gul kyā aa.ī hai dīvār-e-zindāñ se asiir

rāt-din sar apnā Takrāte haiñ uThte baiThte

hai ġhanīmat chand lamhoñ ke liye mil baiThnā

dost duniyā meñ bichhaḌ jaate haiñ uThte baiThte

kis ko yārā-e-sukHan kis ko majāl-e-guftugū

aap jab ḳhanjar hī lahrāte haiñ uThte baiThte

mere dil kī uljhanoñ kā bhī kabhī koī ḳhayāl

zulf to vo apnī suljhāte haiñ uThte baiThte

chashm-e-haq āgāh meñ kyā qadr-o-qīmat un kī ho

chand sikkoñ par jo itrāte haiñ uThte baiThte

ā.īna hai aur vo haiñ aur merā dil 'nasīr'

un kī ban aa.ī hai taḌpāte haiñ uThte baiThte

kis tasawwur mein wo kho jate hain uThte baiThte

apne ji mein aap sharmate hain uThte baiThte

pas rah kar jo sitam Dhate hain uThte baiThte

jab chale jaen to yaad aate hain uThte baiThte

yun hum apne dil ko bahlate hain uThte baiThte

ku-e-jaanan tak pahunch jate hain uThte baiThte

ab to wo rahne lage har waqt mujh se bad-guman

ho bura un ka jo bhaDkate hain uThte baiThte

fasl-e-gul kya aai hai diwar-e-zindan se asir

raat-din sar apna Takraate hain uThte baiThte

hai ghanimat chand lamhon ke liye mil baiThna

dost duniya mein bichhaD jate hain uThte baiThte

kis ko yara-e-sukHan kis ko majal-e-guftugu

aap jab KHanjar hi lahraate hain uThte baiThte

mere dil ki uljhanon ka bhi kabhi koi KHayal

zulf to wo apni suljhate hain uThte baiThte

chashm-e-haq aagah mein kya qadr-o-qimat un ki ho

chand sikkon par jo itraate hain uThte baiThte

aaina hai aur wo hain aur mera dil 'nasir'

un ki ban aai hai taDpate hain uThte baiThte