kisi kafir ko na din-dar ko apna karna

kisī kāfir ko na dīñ-dār ko apnā karnā

ek lamhe ke liye yaar ko apnā karnā

ishq meñ qurb kā armān bhī kyā armāñ hai

saa.e ko chhoḌnā dīvār ko apnā karnā

hameñ bhūlī nahīñ ab tak vafā kī chāleñ

yaad hai us but-e-'ayyār ko apnā karnā

kirchiyāñ chunñā sadā apne anā paikar kī

apne TuuTe hue pindār ko apnā karnā

naaz be-jā na uThānā kisī ahl-e-zar ke

kisī muflis ke dil-e-zār ko apnā karnā

us kī bāñhoñ ke sahāre kī tamannā jaise

dhuup meñ sāya-e-dīvār ko apnā karnā

tū hī vo yūsuf-e-daurāñ hai ki aatā hai jise

ik jhalak meñ bhare bāzār ko apnā karnā

apne ho kar bhī ye apne nahīñ bante apne

ho sake to dil-e-aġhyār ko apnā karnā

vo to ik baat thī ham jis pe aḌe baiThe haiñ

varna aatā hai hameñ yaar ko apnā karnā

dil ke badle meñ jo dil māñge to phir bismillāh

jins-e-ulfat ke ḳharīdār ko apnā karnā

pāk-bāzoñ kā bahā le gayā zo.am-e-taqva

ye terā mujh se gunahgār kā apnā karnā

laakh andhoñ kī ḳhajālat se kahīñ behtar hai

sirf ek dīda-e-bedār ko apnā karnā

ġham-e-furqat meñ taḌapnā hai muqaddar apnā

apnī qismat meñ kahāñ yaar ko apnā karnā

roz-marra kā ye hai khel 'nasīr' un ke liye

ek do bātoñ meñ do chaar ko apnā karnā

kisi kafir ko na din-dar ko apna karna

ek lamhe ke liye yar ko apna karna

ishq mein qurb ka arman bhi kya arman hai

sae ko chhoDna diwar ko apna karna

hamein bhuli nahin ab tak wafa ki chaalen

yaad hai us but-e-'ayyar ko apna karna

kirchiyan chunna sada apne ana paikar ki

apne TuTe hue pindar ko apna karna

naz be-ja na uThana kisi ahl-e-zar ke

kisi muflis ke dil-e-zar ko apna karna

us ki banhon ke sahaare ki tamanna jaise

dhup mein saya-e-diwar ko apna karna

tu hi wo yusuf-e-dauran hai ki aata hai jise

ek jhalak mein bhare bazar ko apna karna

apne ho kar bhi ye apne nahin bante apne

ho sake to dil-e-aghyar ko apna karna

wo to ek baat thi hum jis pe aDe baiThe hain

warna aata hai hamein yar ko apna karna

dil ke badle mein jo dil mange to phir bismillah

jins-e-ulfat ke KHaridar ko apna karna

pak-bazon ka baha le gaya zoam-e-taqwa

ye tera mujh se gunahgar ka apna karna

lakh andhon ki KHajalat se kahin behtar hai

sirf ek dida-e-bedar ko apna karna

gham-e-furqat mein taDapna hai muqaddar apna

apni qismat mein kahan yar ko apna karna

roz-marra ka ye hai khel 'nasir' un ke liye

ek do baaton mein do chaar ko apna karna