wo kya kah gae mujhko kya kahte kahte

vo kyā kah ga.e mujh ko kyā kahte kahte

bhalā kah ga.e vo burā kahte kahte

jahāñ ye na ho aañkh bhar aa.e qāsid

mirī dāstān-e-vafā kahte kahte

uThā thā maiñ kuchh un se kahne ko lekin

zabāñ ruk ga.ī bārhā kahte kahte

vo sunte magar ai hujūm-e-tamannā

hamīñ kho ga.e mudda.ā kahte kahte

zamāne kī āġhosh meñ jā paḌe ham

zamāne ko nā-āshnā kahte kahte

pilā.egā saaqī tū piinī paḌegī

kisī din ravā nāravā kahte kahte

nigāheñ jhukīñ lab hile muskurā.e

vo chup ho ga.e jaane kyā kahte kahte

adhūrī rahī dāstān-e-mohabbat

jahāñ se koī uTh gayā kahte kahte

'nasīr' aise ash.ār un ko sunāo

vo sharmā.eñ bhī marhabā kahte kahte

wo kya kah gae mujh ko kya kahte kahte

bhala kah gae wo bura kahte kahte

jahan ye na ho aankh bhar aae qasid

meri dastan-e-wafa kahte kahte

uTha tha main kuchh un se kahne ko lekin

zaban ruk gai barha kahte kahte

wo sunte magar ai hujum-e-tamanna

hamin kho gae muddaa kahte kahte

zamane ki aaghosh mein ja paDe hum

zamane ko na-ashna kahte kahte

pilaega saqi tu pini paDegi

kisi din rawa narawa kahte kahte

nigahen jhukin lab hile muskurae

wo chup ho gae jaane kya kahte kahte

adhuri rahi dastan-e-mohabbat

jahan se koi uTh gaya kahte kahte

'nasir' aise ashaar un ko sunao

wo sharmaen bhi marhaba kahte kahte