کردے دل نازک کسی ظالم کے حوالے، از راہِ محبت

کردے دل نازک کسی ظالم کے حوالے، از راہِ محبت

بے درد ذرا اور محبت کا مزا لے، نکلے مری حسرت

تو اپنے ہی مانند کسی گل پہ فدا ہو، جس میں نہ وفا ہو

پڑ جائیں مری طرح تجھے جان کے لالے، آجائے طبیعت

اِس گنجِ خدا داد سے سائل کو بھی دلوا، رخسار کا بوسہ

اے بادشاہِ حسن فقیروں کی دعا لے، بڑھتی رہے دولت

خود جان سے بےزار ہوں ہے کس کو ڈراتا، خنجر ہے دکھاتا

اک جانِ حزیں ہے اسے تولے کہ خدا لے، کٹ جائے مصیبت

قابلؔ وہ ہمیں دیکھ کے خوش ہوتا ہے کیا کیا، غیروں سے ہے کہتا

اللہ اسے رنج ومصیبت میں نہ ڈالے، یہ دم ہے غنیمت