saqi mujhe saghar diya mastana hun mastana hun

saaqī mujhe sāġhar diyā mastāna huuñ mastāna huuñ

is aql is idrāk se begāna huuñ begāna huuñ

bulbul sifat ai gul-badan is baaġh meñ har sub.h

terī bahāristān kā dīvāna huuñ dīvāna huuñ

tashbīh daur-e-jām hai tamsīl-e-chashm-e-pur-ḳhumār

tasvīr us kī dekh ke paimāna huuñ paimāna huuñ

jab nargis maḳhmūr uu jaadū kā dam afsūñ kiyā

dīvāngī tab suuñ setī afsāna huuñ afsāna huuñ

garche ba-zāhir duur huuñ is husn ke sultān se

lekin ba-bazm-e-ma.anavī ham-ḳhāna huuñ ham-ḳhāna huuñ

'bedil' jafā-kārī nahīñ kuchh yuuñ hamāre iḳhtiyār

varna ba-fahm-e-dostī farzāna huuñ farzāna huuñ

saqi mujhe saghar diya mastana hun mastana hun

is aql is idrak se begana hun begana hun

bulbul sifat ai gul-badan is bagh mein har subh

teri bahaaristan ka diwana hun diwana hun

tashbih daur-e-jam hai tamsil-e-chashm-e-pur-KHumar

taswir us ki dekh ke paimana hun paimana hun

jab nargis maKHmur u jadu ka dam afsun kiya

diwangi tab sun seti afsana hun afsana hun

garche ba-zahir dur hun is husn ke sultan se

lekin ba-bazm-e-manawi ham-KHana hun ham-KHana hun

'bedil' jafa-kari nahin kuchh yun hamare iKHtiyar

warna ba-fahm-e-dosti farzana hun farzana hun