ساقی مجھے ساغر دیا مستانہ ہوں مستانہ ہوں

ساقی مجھے ساغر دیا مستانہ ہوں مستانہ ہوں

اس عقل اس ادراک سے بیگانہ ہوں بیگانہ ہوں

بلبل صفت اے گل بدن اس باغ میں ہر صبح

تیری بہارستان کا دیوانہ ہوں دیوانہ ہوں

تشبیہ دور جام ہے تمثیل چشم پر خمار

تصویر اس کی دیکھ کے پیمانہ ہوں پیمانہ ہوں

جب نرگس مخمور او جادو کا دم افسوں کیا

دیوانگی تب سوں سیتی افسانہ ہوں افسانہ ہوں

گرچہ بہ ظاہر دور ہوں اس حسن کے سلطان سے

لیکن بہ بزم معنوی ہم خانہ ہوں ہم خانہ ہوں

بیدلؔ جفا کاری نہیں کچھ یوں ہمارے اختیار

ورنہ بہ فہم دوستی فرزانہ ہوں فرزانہ ہوں