dil mein hai KHayal aaj kisi rashk-e-pari ka

dil meñ hai ḳhayāl aaj kisī rashk-e-parī kā

pūchho na mizāj ab mirī shorīda sirī kā

ai sham' shab-e-ġham meñ tire saath bujhe ham

zebā hai laqab ham ko bhī sham' saharī kā

āḳhir hai shab-e-hijr tham ai aah sharar-bār

vaqt aa gayā nazdīk duaa.e saharī kā

badnām hī duniyā meñ rahā qais to āḳhir

achchhā ye tarīqa to nahīñ nāmvarī kā

kyā laa.ī hai phir nik.hat-e-gesū-e-muambar

hai aaj dimāġh aur nasīm-e-saharī kā

tum sub.h se pahle hī chale ḳhair sudhāro

maiñ bhī to namūna huuñ charāġh-e-saharī kā

har sub.h ye laatī hai kisī zulf kī ḳhushbū

bhūlegā na ehsān nasīm-e-saharī kā

jis nargis maḳhmūr se kal dekhā thā tū ne

ab tak hai mujhe nashsha usī niiñd bharī kā

kuchh zād-e-safar paas nahīñ raah hai dushvār

allāh nigahbān mujh aise safarī kā

kahte haiñ vo sun kar mirī rusvā.ī kā qissa

aayā na ḳhayāl us ko mirī parda-darī kā

yā-rab ye huā jaa.e na us ġhairat-e-gul tak

mujh par hī asar ho mirī soz-e-jigrī kā

ai 'qais' mirī jaan hai vo ġhairat-e-lailā

maiñ huur kā shaidā huuñ na dīvāna parī kā

dil mein hai KHayal aaj kisi rashk-e-pari ka

puchho na mizaj ab meri shorida siri ka

ai sham' shab-e-gham mein tere sath bujhe hum

zeba hai laqab hum ko bhi sham' sahari ka

aaKHir hai shab-e-hijr tham ai aah sharar-bar

waqt aa gaya nazdik duae sahari ka

badnam hi duniya mein raha qais to aaKHir

achchha ye tariqa to nahin namwari ka

kya lai hai phir nikhat-e-gesu-e-muambar

hai aaj dimagh aur nasim-e-sahari ka

tum subh se pahle hi chale KHair sudhaaro

main bhi to namuna hun charagh-e-sahari ka

har subh ye lati hai kisi zulf ki KHushbu

bhulega na ehsan nasim-e-sahari ka

jis nargis maKHmur se kal dekha tha tu ne

ab tak hai mujhe nashsha usi nind bhari ka

kuchh zad-e-safar pas nahin rah hai dushwar

allah nigahban mujh aise safari ka

kahte hain wo sun kar meri ruswai ka qissa

aaya na KHayal us ko meri parda-dari ka

ya-rab ye hua jae na us ghairat-e-gul tak

mujh par hi asar ho meri soz-e-jigri ka

ai 'qais' meri jaan hai wo ghairat-e-laila

main hur ka shaida hun na diwana pari ka